اقتاۋ قالاسى اكىمىنىڭ بۇرىنعى ورىنباسارى تيمۋر سادۋاقاسوۆ قازاقستانعا جەتكىزىلدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
ول اسا ءىرى كولەمدەگى الاياقتىق پەن پارا بەرۋگە يتەرمەلەۋ ءىسى بويىنشا كۇدىككە ىلىنگەن. بۇل تۋرالى قارجىلىق مونيتورينگ اگەنتتىگىنىڭ (قما) ءباسپاسوز قىزمەتى حابارلادى.
«قارجىلىق مونيتورينگ اگەنتتىگى باس پروكۋراتۋرانىڭ ۇيلەستىرۋىمەن جانە ۇلتتىق قاۋىپسىزدىك كوميتەتىمەن ءوزارا ءىس-قيمىلدا حالىقارالىق ىزدەۋدە جۇرگەن سادۋاقاسوۆ ت. ح.-نى قازاقستان اۋماعىنا ەكستراديتسيالادى»، – دەلىنگەن رەسمي مالىمدەمەدە.
25 اقپان كۇنى تيمۋر سادۋاقاسوۆ تۇركىستان وبلىسىنداعى «قاپلانبەك» شەكارا بەكەتىندە ۇستالىپ، قما قىزمەتكەرلەرىنە تاپسىرىلدى. ودان كەيىن ول شىمكەنت قالاسىنىڭ تەرگەۋ يزولياتورىنا قامالدى. جاقىن ارادا كۇدىكتى پاۆلودارعا ەتاپپەن جەتكىزىلىپ، قىلمىستىق ءىستى مامانداندىرىلعان اۋدانارالىق سوت قارايتىن بولادى.
بۇعان دەيىن تيمۋر سادۋاقاسوۆ 90 ميلليون تەڭگە كولەمىندە پارا الۋ ىسىنە قاتىستى مەملەكەتارالىق ىزدەۋدە بولعان. ول وزبەكستانعا قاشۋعا ارەكەت جاساعان كەزدە ۇستالعانى بەلگىلى.
ەسكە سالساق، 7 اقپاندا اقتاۋ قالاسى اكىمىنىڭ بۇرىنعى ورىنباسارى تيمۋر سادۋاقاسوۆقا ىزدەۋ جاريالانعان بولاتىن. كەيىننەن ونىڭ اسا ءىرى كولەمدە الاياقتىق جاسادى دەگەن كۇدىككە ىلىنگەنى جانە لاۋازىمدى تۇلعالاردى پارا الۋعا يتەرمەلەگەنى انىقتالعان.
