Aqtaý qalasy ákiminiń burynǵy orynbasary Tımýr Sadýaqasov Qazaqstanǵa jetkizildi, dep habarlaıdy "Adyrna" ulttyq portaly QazTAG-qa siltep.
Ol asa iri kólemdegi alaıaqtyq pen para berýge ıtermeleý isi boıynsha kúdikke ilingen. Bul týraly Qarjylyq monıtorıng agenttiginiń (QMA) baspasóz qyzmeti habarlady.
«Qarjylyq monıtorıng agenttigi Bas prokýratýranyń úılestirýimen jáne Ulttyq qaýipsizdik komıtetimen ózara is-qımylda halyqaralyq izdeýde júrgen Sadýaqasov T. H.-ny Qazaqstan aýmaǵyna ekstradıııalady», – delingen resmı málimdemede.
25 aqpan kúni Tımýr Sadýaqasov Túrkistan oblysyndaǵy «Qaplanbek» shekara beketinde ustalyp, QMA qyzmetkerlerine tapsyryldy. Odan keıin ol Shymkent qalasynyń tergeý ızolıatoryna qamaldy. Jaqyn arada kúdikti Pavlodarǵa etappen jetkizilip, qylmystyq isti mamandandyrylǵan aýdanaralyq sot qaraıtyn bolady.
Buǵan deıin Tımýr Sadýaqasov 90 mıllıon teńge kóleminde para alý isine qatysty memleketaralyq izdeýde bolǵan. Ol Ózbekstanǵa qashýǵa áreket jasaǵan kezde ustalǵany belgili.
Eske salsaq, 7 aqpanda Aqtaý qalasy ákiminiń burynǵy orynbasary Tımýr Sadýaqasovqa izdeý jarııalanǵan bolatyn. Keıinnen onyń asa iri kólemde alaıaqtyq jasady degen kúdikke ilingeni jáne laýazymdy tulǵalardy para alýǵa ıtermelegeni anyqtalǵan.
