دەپۋتات داۋلەت مۇقاەۆ قازاق قوعامىنداعى قازاعا بايلانىستى داستۇرلەردىڭ ءمانى مەن قازىرگى ورىندالۋ فورماسى تۋرالى ءوز پىكىرىن ءبىلدىردى.
ونىڭ ايتۋىنشا، قارالى ۇيگە شىنايى قولداۋ كورسەتۋ ماڭىزدى، ال داستۇرلەردىڭ شەكتەن تىس ورىندالۋى قايعىعا ۇشىراعان وتباسىن ودان ءارى قيىن جاعدايعا ءتۇسىرۋى مۇمكىن.
"قايعى ءار وتباسىنىڭ باسىنا ءتۇسۋى مۇمكىن اۋىر سىناق. بىرەۋ اتا-اناسىنان، ەندى ءبىرى جاقىن تۋىسىنان، بالاسىنان نەمەسە دوسىنان ايىرىلۋى مۇمكىن. مۇنداي كەزدە ەڭ ماڭىزدىسى – مارقۇمنىڭ وتباسى مەن جاقىندارىنا شىنايى قولداۋ كورسەتۋ، ولاردىڭ قايعىسىن ءبولىسۋ", – دەيدى داۋلەت مۇقاەۆ.
ول قازاق قوعامىندا قازاعا بايلانىستى ۇلكەن قوناقاسىلار ۇيىمداستىرۋ ادەتى بار ەكەنىن اتاپ ءوتتى. بۇل ءداستۇردىڭ ماڭىزدىلىعىن جوققا شىعارماي، ونىڭ مانىنەن گورى سىرتقى كورىنىسىنە كوپ كوڭىل بولىنەتىنىن سىنعا الدى. قارالى ءۇيدىڭ يەلەرى قوناق كۇتۋگە ءماجبۇر بولىپ، ءوز قايعىسىن تولىق سەزىنۋگە مۇمكىندىك الا المايتىنىن، ال كەيبىر وتباسىلار قارجىلىق قيىندىقتارعا قاراماستان، داستارحان جايۋ ءۇشىن قارىزعا باتاتىنىن ايتتى.
ء"داستۇر – ۇلتتىڭ رۋحاني تىرەگى، بىراق ونىڭ شەكتەن تىس ورىندالۋى نەگىزگى ماقساتتان الىستاتپاۋى كەرەك. قايعىدا ەڭ باستىسى – جاناشىرلىق پەن شىنايى قولداۋ ەكەنىن ۇمىتپايىق!" – دەيدى قوعام بەلسەندىسى.
ول بۇل ماسەلەنى قازاقستان مۇسىلماندارى ءدىني باسقارماسى (قمدب) تاراپىنان دا، حالىق اراسىندا دا كوبىرەك ناسيحاتتاۋ كەرەكتىگىن ايتىپ، كوپشىلىكتى قايعىدا ادامي قولداۋ كورسەتۋدى باستى نازارعا الۋعا شاقىردى.
