Depýtat Dáýlet Muqaev qazaq qoǵamyndaǵy qazaǵa baılanysty dástúrlerdiń máni men qazirgi oryndalý formasy týraly óz pikirin bildirdi.
Onyń aıtýynsha, qaraly úıge shynaıy qoldaý kórsetý mańyzdy, al dástúrlerdiń shekten tys oryndalýy qaıǵyǵa ushyraǵan otbasyn odan ári qıyn jaǵdaıǵa túsirýi múmkin.
"Qaıǵy ár otbasynyń basyna túsýi múmkin aýyr synaq. Bireý ata-anasynan, endi biri jaqyn týysynan, balasynan nemese dosynan aıyrylýy múmkin. Mundaı kezde eń mańyzdysy – marqumnyń otbasy men jaqyndaryna shynaıy qoldaý kórsetý, olardyń qaıǵysyn bólisý", – deıdi Dáýlet Muqaev.
Ol qazaq qoǵamynda qazaǵa baılanysty úlken qonaqasylar uıymdastyrý ádeti bar ekenin atap ótti. Bul dástúrdiń mańyzdylyǵyn joqqa shyǵarmaı, onyń máninen góri syrtqy kórinisine kóp kóńil bólinetinin synǵa aldy. Qaraly úıdiń ıeleri qonaq kútýge májbúr bolyp, óz qaıǵysyn tolyq sezinýge múmkindik ala almaıtynyn, al keıbir otbasylar qarjylyq qıyndyqtarǵa qaramastan, dastarhan jaıý úshin qaryzǵa batatynyn aıtty.
"Dástúr – ulttyń rýhanı tiregi, biraq onyń shekten tys oryndalýy negizgi maqsattan alystatpaýy kerek. Qaıǵyda eń bastysy – janashyrlyq pen shynaıy qoldaý ekenin umytpaıyq!" – deıdi qoǵam belsendisi.
Ol bul máseleni Qazaqstan musylmandary dinı basqarmasy (QMDB) tarapynan da, halyq arasynda da kóbirek nasıhattaý kerektigin aıtyp, kópshilikti qaıǵyda adamı qoldaý kórsetýdi basty nazarǵa alýǵa shaqyrdy.
