ساۋدا جانە ينتەگراتسيا ءمينيسترى ارمان شاققاليەۆ ەلىمىزدە كارتوپ باعاسى 0,6 پايىزعا تۇستكەنىن مالىمدەدى، دەپ حابارلايدى "ادىرنا" ۇلتتىق پورتالى.
ءماجىلىس وتىرسىنان كەيىن جۋرناليستەر ارمان ابايۇلىنا كارتوپ باعاسىنا بايلانىستى سۇراق قويدى. «كارتوپ باعاسىنىڭ ءوسىمى حالىقتىڭ نارازىلىعىن تۋدىرعانمەن ول ءالى كۇنگە وڭ شەشىمىن تاپتى دەپ ايتا المايمىز. ءدال قازىرگى تاڭدا «ماگنۋم» قوسىمشاسىندا كارتوپ 359 تەڭگەگە ساتىلىپ جاتىر. ال ءبىز بۇل سۇراقتى اۋىل شارۋاشىلىعى مينيسترىنە قويعانىمىزدا «قويمادا كارتوپ جەتكىلىكتى. تەك بۇل جەردە الىپساتارلاردىڭ ارەكەتى باعانى ويناتىپ وتىر» دەگەن بولاتىن. اۋىل شارۋاشىلىعىندا ەلگە قولجەتىمدى باعادا كارتوپ بار بولسا، ونى نارىققا ەنگىزۋگە نە كەدەرگى؟» دەپ سۇرادى جۋرناليست.
ارمان ابايۇلىنىڭ ايتۋىنشا، قازىرگى تاڭدا نارىقتا وزىمىزدە وندىرىلگەن كارتوپ جەتكىلىكتى.
«كەشە عانا ءبىزدىڭ ساۋدا جەلىلەرىنە 240 تەڭگەدەن ساتىلۋى ءتيىس 15 مىڭ توننا كارتوپ جىبەردىك. ءبىزدىڭ وندىرۋشىلەر ترانسپورتتىق شىعىنداردى قوسقاندا كارتوپتى 220-240 تەڭگەگە ساتۋعا دايىن. ءسىز كارتوپ باعاسىنىڭ قىمباتتاۋى ساۋدا جەلىسىنىڭ ماسەلەسى مە دەپ سۇراپ وتىرسىز عوي. ءبىز بۇل ماسەلەنى جان-جاقتى قاراستىرىپ، 100-گە جۋىق اكىمشىلىك ءىس قوزعادىق. قازىرگى تاڭدا بىزدە ەشقانداي زاڭ بۇزعان فاكتىلەر جوق. ءوزىڭىز ايتقان «Small»، «Magnum» ساۋدا جەلىلەرىندە كارتور 180 تەڭگەگە ساتىلىپ جاتىر. ال ەگەر يمپورتتىڭ كارتوبى بولسا، 300 تەڭگە سەكىلدى ءارتۇرلى باعادا بار. بىراق قازىرگى تاڭدا بىزدە كارتوپ جەتكىلىكتى، ەشقانداي پروبلەما جوق. وتكەن اپتانىڭ يندەكسى بويىنشا كارتوپ باعاسى 0,6 پايىزعا ءتۇستى»، – دەدى مينيستر.
سونداي-اق جۋرناليست «ورازا ايى قارساڭىندا ازىق-تۇلىك باعاسى قىمباتتاپ نەمەسە تاپشىلىققا بايلانىستى اجيوتاج بولىپ كەتپەي مە؟» دەپ مينيستردەن سۇرادى. ارمان ابايۇلى «ەشقانداي اجيوتاج بولمايدى» دەپ سەندىردى.
«ءبىزدىڭ ساۋدا جەلىلەر باعانى تومەندەتۋ ءۇشىن ءار ءتۇرلى اكتسيا وتكىزەتىن بولادى. ءبىر سوزبەن ايتقاندا ورازا ايىنىڭ كەزىندە ازىق-تۇلىك باعاسى كوتەرىلمەيدى»، – دەدى ول.
