25 اقپاندا اۋعانستاننىڭ وڭتۇستىگى مەن باتىسىندا بولعان سۋ تاسقىنى سالدارىنان 30-دان استام ادام قازا تاۋىپ، ونداعان ادام جاراقات الدى، دەپ حابارلايدى "ادىرنا" ۇلتتىق پورتالى AmuTV-عا سىلتەمە جاساپ.
سۋ تاسقىنى نوسەر جاۋىننىڭ سالدارىنان ورىن العان. باتىستاعى فاراح پروۆينتسياسىندا كەمىندە 23 ادام قازا تاۋىپ، 44 ادام جاراقات الدى. قۇرباندار اراسىندا ءارتۇرلى جاستاعى ەرلەر مەن ايەلدەر بار. بيلىك وكىلدەرى قازا تاپقاندار سانى ءالى دە ارتۋى مۇمكىن ەكەنىن مالىمدەدى.
فاراح پروۆينتسياسىنىڭ پوليتسياسى ادام شىعىنىن راستادى.
وسى كۇنى گيلمەند جانە كانداگار پروۆينتسيالارىندا كەمىندە 10 ادام، سونىڭ ىشىندە بالالار سۋ تاسقىنىنان قازا تاپتى. سونىمەن قاتار، گيلمەندتىڭ گەرەشك اۋدانىندا تۇرعىن ۇيگە نايزاعاي ءتۇسۋى سالدارىنان التى ادام جاراقات العان.
اۋعانستاندا 2024 جىلى بىرنەشە ءىرى سۋ تاسقىنى بولىپ، جۇزدەگەن ادامنىڭ ءومىرىن جالماعان ەدى.
مامىر ايىندا باعلان پروۆينتسياسىندا 315 ادام قازا تاۋىپ، 1600-دەن استام ادام جارالانسا، ال، ساۋىردە بۇۇ مالىمەتى بويىنشا، 23 پروۆينتسيادا 100-دەن استام ادام قازا تاپقان. شىلدەدە ەلدىڭ شىعىسى مەن سولتۇستىك-شىعىسىنداعى ايماقتاردا 58 ادام كوز جۇمىپ، 380 ادام جارالانعان.
بيلىك وكىلدەرى الداعى كۇندەرى جاعدايدىڭ ودان ءارى ناشارلاۋى مۇمكىن ەكەنىن ەسكەرتۋدە.
