قازاقستان پارلامەنتى ءماجىلىسىنىڭ دەپۋتاتى ماگەررام ماگەرراموۆ پالاتانىڭ وتىرىسىندا جىنىس اۋىستىرۋعا تىيىم سالۋ كەرەك ەكەنىن ايتتى، دەپ حابارلايدى "ادىرنا" ۇلتتىق پورتالى.
دەپۋتاتتىڭ ايتۋىنشا، قازىرگى زاڭناما جىنىستىق سايكەستىك بۇزىلىسى بار، 21 جاسقا تولعان جانە اقىل-ەسى دۇرىس ازاماتتارعا جىنىسىن اۋىستىرۋعا رۇقسات بەرەدى. الايدا ول بۇل جاعدايدى قايتا قاراۋ قاجەتتىگىن اتاپ ءوتتى.
ماگەرراموۆتىڭ پىكىرىنشە، جىنىستىق سايكەستىك بۇزىلىسى – بۇل بەلگىلى ءبىر پسيحيكالىق نەمەسە مىنەز-قۇلىقتىق اۋىتقۋ، سوندىقتان ونى حيرۋرگيالىق نەمەسە گورمونالدى جولمەن تۇزەتۋ دۇرىس ەمەس.
"ەگەر ادامنىڭ فيزيكالىق انومالياسى بولماسا، بىراق ءوزىن باسقا جىنىستا سەزىنسە، بۇل ماسەلە پسيحيكالىق نەمەسە مىنەز-قۇلىقتىق اۋىتقۋمەن بايلانىستى بولۋى مۇمكىن. سوندىقتان دەنى ساۋ ادامعا وپەراتسيا جاساۋ ورىنسىز", – دەدى دەپۋتات.
سونىمەن قاتار، ول مىنەز-قۇلىقتىق نەمەسە پسيحيكالىق اۋىتقۋلاردى حيرۋرگيالىق ادىسپەن "ەمدەۋدىڭ" قيسىنسىزدىعىن اتاپ ءوتتى.
"نپك فراكتسياسى زاڭعا وزگەرىستەر ەنگىزىلگەنگە دەيىن جىنىس اۋىستىرۋ وپەراتسياسىنا تىيىم سالۋدى تالاپ ەتەدى", – دەپ مالىمدەدى ماگەررام ماگەرراموۆ.
