سەيسەنبى كۇنى استانادا ليفتىدەگى 5 جاسار بالانى پىشاقتاعان ءجاسوسپىرىمدى پسيحديسپانسەر قىزمەتكەرى ۇرعانى تۋرالى اقپارات تارادى. بۇل تۋرالى استاناداعى ەرەكشە بالالاردىڭ اتا-انالارى وداعىنىڭ ءتورايىمى گۇلسان ماۋينا مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، ءجاسوسپىرىم سانيتاردىڭ ەكى رەت قول كوتەرگەنىن ايتقان.
"سانيتار بالاعا ەكى رەت قول كوتەرگەن: كەشە جانە بۇگىن. ءبىز قازىر سوت-مەديتسينالىق ساراپتاما جاساتۋعا تىرىسىپ جاتىرمىز. پوليتسياعا حابارلاستىق، ۋچاسكەلىك پوليتسيا قىزمەتكەرى كەلدى، بىراق ازىرگە ناتيجە جوق. بالانىڭ اناسى ەكى كۇن بويى ساراپتاما جاساتا الماي ءجۇر", – دەدى گۇلسان ماۋينا.
استانا پسيحيكالىق دەنساۋلىق ورتالىعى بۇل وقيعاعا تۇسىنىكتەمە بەردى. مەكەمە وكىلدەرىنىڭ مالىمەتىنشە، اناسى 102-گە حابارلاسقاننان كەيىن پوليتسەيلەر اۋرۋحاناعا كەلگەن. كەزەكشى دارىگەر مەن مەدبيكە ءجاسوسپىرىمدى قاراپ، اناسىنىڭ كەلىسىمىمەن فوتوعا تۇسىرگەن.
"تەرىسى تازا، تەرىنىڭ تۇتاستىعى بۇزىلماعان، ناۋقاس كورسەتكەن جەرلەردە گەماتومالار مەن ىسىنۋلەر انىقتالعان جوق", – دەپ حابارلادى ورتالىق.
بۇل ءىس بويىنشا سوت-مەديتسينالىق ساراپتاما تاعايىندالىپ، ونىڭ قورىتىندىسى كەيىن بەلگىلى بولاتىنى ايتىلدى.
ەسكە سالا كەتەيىك، استانادا ليفتىدە ءجاسوسپىرىم 5 جاسار بالانىڭ بەتىن پىشاقپەن تىلگىلەپ تاستاعان ەدى. كەيىننەن ءجاسوسپىرىمنىڭ پسيحياتريالىق اۋرۋحاناعا جاتقىزىلعانى بەلگىلى بولدى.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز