بىلتىر «ارىس-تۇلكىباس» كەشەندى قيسىق ۋچاسكەسىنىڭ تۇلكىباس-ارىس تەمىر جول ۋچاسكەسىندە جۇك پويىزىنىڭ 8 ۆاگونى رەلستەن شىعىپ كەتكەن بولاتىن. تۇركىستان وبلىسى بويىنشا كولىكتىك باقىلاۋ ينسپەكتورى بۇل وقيعاعا «ورال ۆاگون جوندەۋ كاسىپورنىن» كىنالى دەپ تانىدى، دەپ حابارلايدى «ادىرنا» ءتىلشىسى.
«تۇركىستان وبلىسى تۇلكىباس اۋداندىق سوتى شەتەلدىك كومپانياعا قاتىستى ءۇش اكىمشىلىك قۇقىق بۇزۋشىلىق تۋرالى ءىس ماتەريالدارىن زەردەلەي كەلە، تەرگەۋ بارىسىندا 8 جۇك ۆاگونىنىڭ رەلستەن شىعىپ كەتۋىنە تەحنيكالىق سەبەپ ورال ۆاگون جوندەۋ كاسىپورنى پلاتفورماسىن ساپاسىز دەپو جوندەۋدەن وتكىزگەنى انىقتالعانىن كورسەتتى. وۆجك-نىڭ جىلجىمالى قۇرامدى، سونداي-اق تەمىر جول كولىگىندە قوزعالىس قاۋىپسىزدىگىن قامتاماسىز ەتەتىن تەحنيكالىق قۇرالداردى كۇتىپ ۇستاۋ، پايدالانۋ جانە جوندەۋ بويىنشا ءتيىستى شارالاردى قابىلداماعانى ءۇشىن كىناسى ءتيىستى قۇجاتتارمەن راستالدى»،—دەلىنگەن حابارلامادا.
وسىلايشا سوت پويىز رەلستەن شىعىپ كەتكەنى ءۇشىن كومپانياعا 1,4 ملن تەڭگە ايىپپۇل سالىندى. سوت شەشىمدەرى زاڭدى كۇشىنە ەندى.
ەسكە سالايىق، وتكەن جىلدىڭ 25 ماۋسىمىندا تۇلكىباس اۋدانىندا جۇك پويىزى رەلستەن شىعىپ كەتكەن ەدى. وقيعادان ەشكىم زارداپ شەككەن جوق.
