23 اقپاندا استانا قالاسىنىڭ اكىمى جەڭىس قاسىمبەك Instagram پاراقشاسىندا ازىق-تۇلىك قاۋىپسىزدىگىنە بايلانىستى شاھاردا قانداي ءىس-شارالار جۇزەگە اسىپ جاتقانى تۋرالى ايتتى، دەپ حابارلايدى «ادىرنا» ءتىلشىسى.
«قالامىزدا ازىق-تۇلىك قاۋىپسىزدىگىن نىعايتۋعا سەپتىگىن تيگىزەتىن كاسىپورىندار اشۋدى ارى قاراي جالعاستىرامىز. مەن تاماق ونەركاسىبىن، لوگيستيكانى، ساۋدانى جانە تاعى باسقا دامىتاتىن جاڭا ءارى سالىنىپ جاتقان كاسىپورىنداردى ارالاپ شىقتىم. «RnR Group» جشس كاسىپورىندار كەشەنىنىڭ جۇمىسىمەن تانىستىم. ول – تاۋلىگىنە 25 توننا ءونىم شىعاراتىن نان زاۋىتى جانە كوكونىس قويماسى. 2026 جىلى تاۋلىگىنە 100 توننا ءسۇت وڭدەيتىن زاۋىت اشۋ جوسپارلانىپ وتىر. بۇل جوباعا تارتىلعان جەكە ينۆەستيتسيالار سوماسى 8,1 ملرد تەڭگەنى قۇرادى. قازىردىڭ وزىندە 250-گە جۋىق جۇمىس ورنى اشىلدى»،—دەپ ءتۇسىندىردى ول.
ايتۋىنشا، بيىل جەكە ينۆەستيتسيالار ەسەبىنەن سارايشىق اۋدانىندا «تەحنودوم» دۇكەندەر جەلىسىنىڭ ورتالىق قويماسىن اشۋ جوسپارلانىپ وتىر. جوباعا تارتىلعان ينۆەستيتسيا 11,1 ملرد تەڭگەنى قۇرايدى. ناتيجەسىندە 200-گە جۋىق جاڭا جۇمىس ورنى اشىلماق.
