AQŞ prezidentı Donald Tramp Ukrainadan äskeri kömek retınde jūmsalǧan qarajattyŋ ötemın qaitarudy talap ettı, dep habarlaidy "Adyrna" ūlttyq portaly DW-ge sılteme jasap.
"Men Ukraina bız salǧan milliardtaǧan dollar üşın bızge bırdeŋe beruı kerek dep sanaimyn. Sondyqtan bız sirek jer metaldaryn, mūnaidy jäne mümkın bolatyn barlyq resurstardy sūraimyz", – dedı Tramp.
Merilendte ötken Konservativtı saiasi ıs-qimyldar konferensiiasynda (CPAC) söilegen sözınde ol Europa elderı Ukrainaǧa kömek retınde nesie bergenın, al AQŞ ondai jasamaǧanyn atap öttı. Sol sebeptı Amerikaǧa belgılı bır ötemaqy tölenuı kerek dep esepteidı.
"Bız qarajatymyzdy qaitarǧymyz keledı, öitkenı būl ädıletsızdık", – dedı Tramp.
Sonymen qatar, ol Vaşington men Kiev paidaly qazbalarǧa qatysty kelısım jasauǧa öte jaqyn ekenın aitty.
Al ukrainalyq derekközderdıŋ aituynşa Vladimir Zelenskii AQŞ pen Ukraina arasyndaǧy sirek jer metaldaryn öndıruge qatysty kelısımnıŋ qazırgı nūsqasyna qol qoiuǧa daiyn emes.
"Bırneşe dauly mäseleler bar, sondyqtan prezident ony qazırgı küiınde qabyldauǧa daiyn emes", – dedı derekköz.
The New York Times basylymynyŋ mälımetınşe, AQŞ Ukrainaǧa kelısımnıŋ jaŋa nūsqasyn ūsynǧan. Bıraq onyŋ keibır şarttary 14 aqpanda Kievke qarjy ministrı Skott Bessent alyp kelgen aldyŋǧy nūsqadan da qataŋ.
Ukraina tarapy būl şarttarǧa kelısetın-kelıspeitının älı naqtylaǧan joq. Joǧarǧy Radanyŋ spikerı Ruslan Stefanchuktyŋ aituynşa, 24 aqpanda ükımet deŋgeiındegı arnaiy top kelısım boiynşa jūmysty bastaidy. Ukraina Vaşingtonnyŋ öz resurstaryna qol jetkızuıne jauap retınde naqty qauıpsızdık kepıldıkterın alǧysy keledı.
Eske sala keteiık, būǧan deiın Ukraina prezidentı Vladimir Zelenskii AQŞ ūsynǧan Ukrainanyŋ paidaly qazbalarynyŋ 50%-yna qūqyq beretın kelısımge qol qoiudan bas tartqan bolatyn.
Ūqsas jaŋalyqtar
