اقش-تىڭ نيۋ-يورك شتاتىنىڭ سوتى 27 جاستاعى حادي ماتارا 2022 جىلى بريتاندىق-ۇندىستاندىق جازۋشى سالمان ءرۋشديدى ولتىرۋگە وقتالعانى ءۇشىن كىنالى دەپ تانىدى. وعان 30 جىلدان استام تۇرمە جازاسى بەرىلۋى مۇمكىن، دەپ حابارلايدى "ادىرنا" ۇلتتىق پورتالى BBC-گە سىلتەپ.
ماتار 2022 جىلدىڭ تامىزىندا نيۋ-يوركتىڭ چوتوكۋا قالاسىندا وتكەن لەكتسيا كەزىندە ساحناعا جۇگىرىپ شىعىپ، ءرۋشديدى پىشاقتاپ تاستاعان. جازۋشى اۋىر جاراقات الىپ، باۋىرى زاقىمدانىپ، ءبىر كوزىنىڭ كورۋ قابىلەتىنەن ايىرىلدى. سونىمەن قاتار، جۇيكە جۇيەسىنە تيگەن زاقىم سالدارىنان قولىنىڭ قيمىلداۋ مۇمكىندىگى شەكتەلگەن.
ءىس چوتوكۋا وكرۋگىنىڭ سوتىندا قارالدى. ماتارانى جازۋشىعا قاستاندىق جاساۋ جانە اۋىر دەنە جاراقاتىن كەلتىرۋ باپتارى بويىنشا ايىپتى دەپ تانىدى. سونداي-اق، شابۋىل كەزىندە ساحنادا وتىرعان جۋرناليست گەنري ريز دە جاراقات العان. ول باسىنان جەڭىل سوققى الىپ، امان قالدى.
سوت ۇكىمى 2024 جىلدىڭ 23 ساۋىرىندە جاريالانادى.
سوت وتىرىسىندا سالمان رۋشدي شابۋىل ءساتىن ەسكە الىپ، ساحنادا وتىرعان كەزدە كۇتپەگەن جەردەن وزىنە قاراي جۇگىرگەن ادامدى كورگەنىن ايتتى.
"ونىڭ كوزدەرى قاراڭعى ءارى وتە اشۋلى كورىندى. باستاپقىدا مەنى بىرەۋ يتەرىپ جىبەردى دەپ ويلادىم، كەيىنىرەك پىشاقتالعانىمدى ءتۇسىندىم", – دەدى جازۋشى.
جالپى، رۋشدي 15 رەت پىشاق جاراقاتىن العان. ول كوزىنەن، بەتىنەن، موينىنان، كەۋدەسىنەن جانە سانىنان جاراقات الدى.
