قازاقستان رەسپۋبليكاسى سىرتقى ىستەر ءمينيسترى ەرمەك كوشەرباەۆ يران يسلام رەسپۋبليكاسى سىرتقى ىستەر ءمينيسترى ابباس اراكچيمەن تەلەفون ارقىلى سويلەستى، دەپ حابارلايدى "ادرىرنا".
تاراپتار تاياۋ شىعىستاعى قازىرگى جاعدايدى تالقىلاپ، ەكىجاقتى ىنتىماقتاستىقتىڭ وزەكتى ماسەلەلەرى بويىنشا پىكىر الماستى.
سۇحبات بارىسىندا كوشەرباەۆ يراندىق ارىپتەسىنە يران توڭىرەگىندەگى جاعدايعا بايلانىستى الاڭداۋشىلىق ءبىلدىرىپ، وسىدان بۇرىن قازاقستان پرەزيدەنتى قاسىم-جومارت توقاەۆ مالىمدەگەندەي قازاقستان تاراپى تۇركىستان قالاسىن بەيبىت كەلىسسوزدەر وتكىزۋگە الاڭ رەتىندە ۇسىنۋعا دايىن ەكەندىگىن راستادى.
سونىمەن قاتار، تاراپتار ەكىجاقتى قاتىناستاردىڭ وزەكتى ماسەلەلەرى بويىنشا ديالوگتى جالعاستىرۋعا كەلىستى.
ايتا كەتسەك، بۇعان دەيىن پاكىستان اقش پەن ءيزرايلدىڭ يرانعا قارسى سوعىسىن توقتاتۋ ماقساتىنداعى كەلىسسوزدەرگە الاڭ ۇسىنۋعا دايىن ەكەنىن ايتقان بولاتىن. بۇل تۋرالى 24 ناۋرىزدا ەل پرەمەر-ءمينيسترى شاحباز شاريف مالىمدەدى.
ول يسلامابادتىڭ تاياۋ شىعىستاعى سوعىستى توقتاتۋ ماقساتىندا جۇرگىزىلىپ جاتقان ديالوگتى تولىق قۇپتايتىنىن جەتكىزدى.
«اقش پەن يران كەلىسىم بەرگەن جاعدايدا، پاكىستان مازمۇندى ءارى تۇپكىلىكتى كەلىسسوزدەردى وتكىزۋگە جاردەمدەسۋ ءۇشىن قابىلداۋشى تاراپ بولۋعا دايىن جانە مۇنى ءوزى ءۇشىن ۇلكەن مارتەبە سانايدى. بۇل كەلىسسوزدەر جالعاسىپ جاتقان قاقتىعىستى جان-جاقتى رەتتەۋگە باعىتتالادى»، – دەپ جازعان شاحباز شاريف.
قازاقستان پرەزيدەنتى قاسىم-جومارت توقاەۆ تا 21 ناۋرىزدا تاياۋ شىعىس كەلىسسوزىنە تۇركىستاندى الاڭ رەتىندە ۇسىنعان بولاتىن. ول قازاقستاننىڭ قاقتىعىس ايماعىنا جاقىن وڭىردە ورنالاسقانىن اتاپ ءوتىپ، ەلدىڭ بەيبىت ۇستانىمدى قولدايتىنىن جەتكىزگەن.
