وسكەمەن قالاسىندا بالالاردى يتەرىپ، دورەكىلىك تانىتقان تاربيەشىنىڭ ۇستىنەن ءىس قوزعالدى. بۇل تۋرالى ۆيدەو جەلىگە تارادى, دەپ حابارلايدى “ادىرنا” ۇلتتىق پورتالى.
اتا-انالار ۆيدەودا تاربيەشىنىڭ بالالاردى يتەرىپ جاتقانىن، كەيبىر بالالاردىڭ بەتىندە كوگەرگەن ىزدەر بايقالعانىن ايتىپ جاتىر.
«تاربيەشى بالالارعا قاتال قاراعان. ويىنشىقتاردى ءوزىمىز ساتىپ الىپ بەرسەك تە، ولارمەن ويناتپاعان. ەگەر جىلاسا، ولاردى كۇشپەن يتەرىپ جىبەرگەن. ءبىر كادردا ۇيقىسى كەلىپ وتىرعان ۇلىمدى دارەتحاناعا جەتەكتەپ اپارىپ، ىشىنەن بالام مالمانداي سۋ بولىپ شىققانىن كوردىم. باسقا ءبىر بالانىڭ بەتى كوگەرگەن. وسى بالانىڭ اناسى ۆيدەونى كورسەتۋدى تالاپ ەتتى. ءبىز وسى جاعدايلارعا بەيجاي قاراي الماي پوليتسياعا حابارلاستىق. بىراق ەشقانداي كەرى بايلانىس بولمادى. ال ءبىزدىڭ ارىزىمىزعا باسشىلىق نازار اۋدارمادى. ءتىپتى كەشىرىم دە سۇرامادى. ۇلىمدا دا كوگەرگەن ىزدەر بار. وسىدان كەيىن جۋرناليستەرگە حابارلاسۋعا تۋرا كەلدى»، – دەدى بالالاردىڭ ءبىرىنىڭ اناسى دانا كابدۋللينا.
اتا-انالار اي سايىن 70 مىڭ تەڭگە تولەيدى. باسشىلىق بارلىق تاربيەشىلەردىڭ جوعارى ءبىلىمى مەن مول تاجىريبەسى بار ەكەنىن ايتقان. الايدا، كىنالى تاربيەشى ارنايى ورتا ءبىلىمدى بولىپ شىقتى.
شقو ءبىلىم باسقارماسى جانجالدان كەيىن تاربيەشىنى جۇمىستان بوساتىپ، ماتەريالداردى قۇقىق قورعاۋ ورگاندارىنا تاپسىرعانىن حابارلادى. قالالىق پوليتسيا باسقارماسى قىلمىستىق ءىس قوزعالعانىن جانە تەرگەۋ جۇرگىزىلىپ جاتقانىن راستادى.
بىراق اتا-انالار بالاباقشا باسشىلىعىنىڭ جاۋاپكەرشىلىككە تارتىلمايتىنىن، ال جۇمىستان شىعارىلعان تاربيەشىنىڭ باسقا بالاباقشاعا ورنالاسۋى مۇمكىن ەكەندىگىنە الاڭدايدى.
