ەكس-پرەزيدەنت نۇرسۇلتان نازارباەۆتىڭ «بايتاۋ» قورىنا قارايتىن ۇشقوڭىر رەزيدەنتسياسىنىڭ اينالاسىنداعى كەمى 9 مىڭ گەكتار جەر مەملەكەتتىك «قايتارىلعان اكتيۆتەردى باسقارۋ كومپانياسى» بالانسىنا وتكەن. بۇل اقپارات بىرىڭعاي مەملەكەتتىك جىلجىمايتىن مۇلىك كاداسترىندا كورسەتىلگەن، دەپ حابارلايدى “ادىرنا” ۇلتتىق پورتالى “ازاتتىق راديوسىنا” سىلتەمە جاساپ.
اقپاراتقا سايكەس، الماتى وبلىسى قاراساي اۋدانى شامالعان اۋىلىنا قاراستى ءۇش جەر تەلىمى (كاداستر نومىرلەرى 03047152017, 03047542042, 03047542029) 2023 جىلى قايرات ساتىبالدىدان نۇرسۇلتان نازارباەۆقا بەرىلگەن رەزيدەنتسيانى اينالا قورشاپ جاتىر. بۇل ۇشقوڭىر جايلاۋىندا بولات نازارباەۆ جەكە كومپانيالارى ارقىلى يەمدەنگەن اۋماعى ەڭ ۇلكەن جەرلەر. جالپى كولەمى 9 مىڭ گەكتاردان اسادى.
بۇل جەر ۋچاسكەلەرى 2022 جىلى بولات نازارباەۆتىڭ Prime Capital Holding دەگەن كومپانياسىنا تيەسىلى كاسىپورىنداردىڭ مەنشىگىندە بولعان. قازىر بۇل كومپانيا بولات نازارباەۆتىڭ ۇلى نۇربول نازارباەۆقا قارايدى.
باسىلىمنىڭ مالىمەتىنشە، جەر تەلىمدەرى مەملەكەتكە قاشان قايتارىلعانى بەيمالىم. بۇل جونىندە جاريا حابارلانعان جوق. «قايتارىلعان اكتيۆتەردى باسقارۋ كومپانياسىنىڭ» ازاتتىققا بەرگەن جاۋابىنا قاراعاندا، قايتارىلعان جەرلەردىڭ بۇرىنعى يەسى تۋرالى مالىمەت «قۇپيا» ساقتالادى.
«زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ مەن قارجى مينيسترلىگىنىڭ اكتيۆتەردى باسقارۋ ءتارتىبى بويىنشا، كومپانيا قايتارىلعان اكتيۆتەر يەسىنىڭ جەكە مالىمەتتەرىن قۇپيا ساقتايدى»، – دەپ جازىلعان كومپانيانىڭ جازباشا جاۋابىندا.
اۋماقتىق بولىنىسكە سايكەس، شامالعان اۋىلدىق وكرۋگىنە قارايتىن ۇشقوڭىر جايلاۋىندا نازارباەۆتار اۋلەتىنىڭ جەكە يەلىگەندە جانە ۋاقىتشا پايدالانۋ قۇقىعىندا بۇدان باسقا دا كولەمى كىشىرەك ۋچاسكەلەر بولعان. كاداستر بازاسىنا سايكەس، ول جىلجىمايتىن مۇلىكتەر دە ءىشىنارا مەملەكەتكە وتكەن. سولاردىڭ ۇلكەنىن (كاداستر ءنومىرى: 030471635684) «قايتارىلعان اكتيۆتەردى باسقارۋ كومپانياسى» 20 اقپاندا 127 ملن تەڭگەگە ساتۋعا شىعاردى. ۋچاسكە اۋماعى 142 گەكتاردان اسادى.
دەرەككوزگە سۇيەنسەك، ۇشقوڭىر جايلاۋىنداعى رەزيدەنتسيا مەن عيمارات ورنالاسقان شاعىن جەر ۋچاسكەسى بۇرىنعى پرەزيدەنت نۇرسۇلتان نازارباەۆتىڭ يەلىگىندە قالىپ وتىر. ەكس-پرەزيدەنت بۇل جىلجىمايتىن مۇلىكتى «بايتاۋ» قورى مەن «Smart investments» جشس ارقىلى مەنشىكتەپ وتىر.
