2024 جىلدىڭ 25 جەلتوقسانىندا باكۋدەن گروزنىيعا ۇشقان Embraer 190 ۇشاعىنىڭ اقتاۋداعى اپات الدىنداعى بورتتاعى دىبىس جازبالارى تاراپ كەتتى. ازەربايجان ۇشاعى سوڭعى جارتى ساعاتتا اقتاۋ اۋەجايىنان كوماندا العانى بەلگىلى بولدى. رەسەيلىك Baza سايتى جاريالاعان بورت جازباسى وقيعانىڭ ەگجەي-تەگجەيى مەن قيىن جاعدايداعى ۇشقىشتاردىڭ ارەكەتىن كورسەتەدى، بىراق رەسەيلىك سايت ونى ءوز ىڭعايىنا بەيىمدەپ ۇسىنۋعا تىرىسقان دەپ حابارلايدى “ادىرنا” ۇلتتىق پورتالى.
جازباداعى دەرەككە قاراعاندا ۇشاق سوڭعى 2 ساعات بويى اپاتتى جاعدايدى باستان كەشىرگەن. گروزنىيعا قونۋ الدىندا ۇشاق كابيناسىندا GPS سيگنالى جوعالىپ، ەكيپاج اراسىندا ۇرەي تۋعىزعان. ۇشاق كەيىن مينەرالنىە ۆودى، سوسىن ماحاچكالا اۋەجايلارىنا بەت العان. اپات الدىنداعى سوڭعى 26 مينۋتتا اقتاۋ اۋەجايىمەن بايلانىستا بولعانى، سونىڭ وزىندە بايلانىستىڭ ءجيى ءۇزىلىپ، قوسىلعانى بايقالادى.
اقتاۋ اۋەجايى مۇناراسىنداعى ديسپەتچەر ۇشاقتىڭ قاۋىپسىز قونۋىنا قاجەتتى شارالاردى ۋاقتىلى قابىلداۋعا تىرىسقان. ءسوز اراسىندا قونۋ الاڭىنىڭ جارىقتارى جاعىلعانى ايتىلادى.
جازباداعى دەرەكتەر سوڭعى ەكى ساعاتتا ۇشقىشتاردىڭ بورتتاعى جاعدايعا الاڭداعانىن، وتتەگى تاپشىلىعىن بولدىرماۋ ءۇشىن تومەن ۇشقانىن كورسەتەدى. ال اقتاۋ اۋەجايىنا جاقىنداعاندا ۇشقىشتار قونۋ جولاعىن بىردەن كورمەسە كەرەك، جولاقتى ءبار ساتكە اۆتوموبيل جولىمەن شاتاستىرعانى بايقالادى.
سوڭعى ەكى ساعات ۇشقىشتاردىڭ جانتالاسىپ، بارىنشا ۇشاقتاعى قاۋىپسىزدىكتى ساقتاۋعا تىرىسقانىن كورسەتەدى. ۇشقىشتاردىڭ ءبىرىنىڭ تاجىريبەسىزدىگى دە بايقالعان. اپاتتى جاعدايداعى ۇشاقتى باسقارۋداعى بالاما ارەكەتتەر قولعا الىنعان. بىراق سونىڭ بارىنە قاراماستان، ۇشاق قونار كەزىندە اپاتقا ۇشىراعان.
اپات كەزىندە ۇشاقتا 67 ادام بولعان، ونىڭ 38-ءى قايتىس بولدى. بۇل ەكيپاجداردىڭ قيىن جاعدايلاردا جۇمىس ىستەۋگە دۇرىس دايىندالۋىنىڭ ماڭىزدىلىعىن جانە اۋە كەمەلەرىندەگى قاۋىپسىزدىك جۇيەلەرىن جاقسارتۋدىڭ قاجەتتىلىگىن كورسەتەدى.
