يسپانيا سوتى يسپانيا فۋتبول فەدەراتسياسىنىڭ بۇرىنعى باسشىسى لۋيس رۋبيالەستى 2023 جىلعى ايەلدەر اراسىنداعى الەم چەمپيوناتىنىڭ ماراپاتتاۋ راسىمىندە فۋتبولشى دجەنني ەرموسونى ەركىنەن تىس سۇيگەنى ءۇشىن سەكسۋالدىق زورلىق كورسەتتى دەپ تانىدى، دەپ حابارلايدى “ادىرنا” ۇلتتىق پورتالى.
پروكۋرورلار رۋبيالەستى ەكى جارىم جىلعا باس بوستاندىعىنان ايىرۋدى سۇراعان: ءبىر جىلى — سەكسۋالدىق زورلىق ءۇشىن، ءبىر جارىم جىلى — قىسىم كورسەتكەنى ءۇشىن. الايدا سوت ونى باس بوستاندىعىنان ايىرماي، 10 مىڭ ەۋرودان استام ايىپپۇل تولەۋگە مىندەتتەدى. سونداي-اق، وعان دجەنني ەرموسوعا 200 مەتردەن جاقىنداۋعا جانە ءبىر جىل بويى بايلانىسۋعا تىيىم سالىندى.
سوت بارىسىندا لۋيس رۋبيالەس فۋتبولشىنىڭ سۇيىسكە كەلىسىم بەرگەنىنە ء“ابسوليۋتتى سەنىمدى” بولعانىن مالىمدەدى. ول بۇل ارەكەتىن “ەموتسيالىق ىقىلاس بەلگىسى” دەپ اتاپ، وقيعانىڭ سول ساتتە “وزدىگىنەن بولعانىن” ايتتى.
فۋتبولشى دجەنني ەرموسو سوتتا سۇيىسكە ەشقاشان كەلىسىم بەرمەگەنىن اشىق ايتتى. بۇل وقيعا ۇلكەن جانجالعا ۇلاسىپ، الەمدە #SeAcabó ء(“بارى ءبىتتى”) قوزعالىسىنىڭ تارالۋىنا سەبەپ بولدى. قوزعالىس ايەلدەر فۋتبولىنداعى تەڭ قۇقىقتاردى تالاپ ەتكەن ناۋقانعا اينالدى.
جانجالدان كەيىن لۋيس رۋبيالەس يسپانيا فۋتبول فەدەراتسياسىنىڭ پرەزيدەنتى جانە ۋەفا اتقارۋ كوميتەتىنىڭ ۆيتسە-پرەزيدەنتى قىزمەتىنەن كەتتى. سونىمەن قاتار، فيفا تارتىپتىك كوميتەتى ونى ءۇش جىلعا فۋتبولمەن بايلانىستى كەز كەلگەن قىزمەتتەن شەتتەتكەن.
