قاتونقاراعاي اۋدانىندا تۇرعىنداردىڭ ۇسىنىسىمەن جۇمىس كۇنى تاڭعى 08:00-دە باستالىپ، 17:30-دا اياقتالاتىن بولىپ وزگەردى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
2025 جىلدىڭ 5 قاڭتارىنان باستاپ قاتونقاراعاي اۋدانىندا مەملەكەتتىك جانە الەۋمەتتىك مەكەمەلەردىڭ جۇمىس ۋاقىتى پيلوتتىق رەجيمدە وزگەردى. ەندى مەكەمەلەر تاڭعى 08:00-دە جۇمىسقا كىرىسىپ، كەشكى 17:30-دا اياقتايدى. تۇسكى ءۇزىلىس ۋاقىتى 12:00-دەن 13:30-عا دەيىن. جاڭا كەستەگە اۋداننىڭ 40 مەكەمەسى كوشتى.
اۋداندىق ىشكى ساياسات ءبولىمى بۇل وزگەرىس ەڭبەك ونىمدىلىگىن ارتتىرىپ، ءوڭىردىڭ دامۋىنا وڭ اسەر ەتەتىنىن اتاپ ءوتتى.
وتكەن جىلدىڭ جەلتوقسان ايىندا وبلىستىق باسقارمالار باسشىلارى اۋدانداعى 18 ەلدى مەكەننىڭ تۇرعىندارىمەن كەزدەسۋلەر وتكىزگەن. ورەل، ارشاتى، بەرەل، جامبىل جانە باسقا دا اۋىلداردىڭ تۇرعىندارى ۇسىنىستى تالقىلاپ، كوپشىلىگى جۇمىس كۇنىن ەرتە باستاۋ يدەياسىن قولداعان.
اۋداندىق ىشكى ساياسات ءبولىمى جۇمىس ۋاقىتىنىڭ وزگەرۋى جەرگىلىكتى كليماتتىق جاعدايلاردى، تۇرعىنداردىڭ ءومىر ءسۇرۋ ىرعاعى مەن ءوڭىردىڭ ەكونوميكالىق بەلسەندىلىگىن ەسكەرەتىنىن مالىمدەدى.
2023 جىلدىڭ جەلتوقسانىندا قازاقستانداعى ۋاقىت ەسەبىن وزگەرتۋ تۋرالى زاڭ جوباسى قوعامدىق تالقىلاۋعا شىعارىلعان بولاتىن. بۇل باستاما قوعامدا ۇلكەن پىكىرتالاس تۋعىزدى – "اشىق نقا" پورتالىندا 130-دان استام بەتتەن تۇراتىن پىكىرلەر جازىلىپ، ولاردىڭ باسىم بولىگى قارسىلىق بىلدىرگەن.
2024 جىلدىڭ 2 تامىزىندا ساۋدا جانە ينتەگراتسيا ءمينيسترى ارمان شاككاليەۆ ۋاقىت بەلدەۋىن بۇرىنعى قالپىنا كەلتىرۋ مۇمكىن ەمەس ەكەنىن ايتتى. ال 2 قىركۇيەكتە شىعىس قازاقستان وبلىسىنىڭ اكىمى ەرمەك كوشەرباەۆ ايماقتاعى ۋاقىت بەلدەۋىن قايتا قاراۋ ماسەلەسىن ساۋدا مينيسترلىگى قاراپ جاتقانىن مالىمدەدى. بۇل تۇرعىنداردىڭ وزگەرىسكە بايلانىستى كوپتەپ شاعىمدانۋىمەن بايلانىستى بولعان.
