Qatonqaraǵaı aýdanynda turǵyndardyń usynysymen jumys kúni tańǵy 08:00-de bastalyp, 17:30-da aıaqtalatyn bolyp ózgerdi, dep habarlaıdy "Adyrna" ulttyq portaly Ulysmedıaǵa siltep.
2025 jyldyń 5 qańtarynan bastap Qatonqaraǵaı aýdanynda memlekettik jáne áleýmettik mekemelerdiń jumys ýaqyty pılottyq rejımde ózgerdi. Endi mekemeler tańǵy 08:00-de jumysqa kirisip, keshki 17:30-da aıaqtaıdy. Túski úzilis ýaqyty 12:00-den 13:30-ǵa deıin. Jańa kestege aýdannyń 40 mekemesi kóshti.
Aýdandyq ishki saıasat bólimi bul ózgeris eńbek ónimdiligin arttyryp, óńirdiń damýyna oń áser etetinin atap ótti.
Ótken jyldyń jeltoqsan aıynda oblystyq basqarmalar basshylary aýdandaǵy 18 eldi mekenniń turǵyndarymen kezdesýler ótkizgen. Órel, Arshaty, Berel, Jambyl jáne basqa da aýyldardyń turǵyndary usynysty talqylap, kópshiligi jumys kúnin erte bastaý ıdeıasyn qoldaǵan.
Aýdandyq ishki saıasat bólimi jumys ýaqytynyń ózgerýi jergilikti klımattyq jaǵdaılardy, turǵyndardyń ómir súrý yrǵaǵy men óńirdiń ekonomıkalyq belsendiligin eskeretinin málimdedi.
2023 jyldyń jeltoqsanynda Qazaqstandaǵy ýaqyt esebin ózgertý týraly zań jobasy qoǵamdyq talqylaýǵa shyǵarylǵan bolatyn. Bul bastama qoǵamda úlken pikirtalas týǵyzdy – "Ashyq NQA" portalynda 130-dan astam betten turatyn pikirler jazylyp, olardyń basym bóligi qarsylyq bildirgen.
2024 jyldyń 2 tamyzynda Saýda jáne ıntegraııa mınıstri Arman Shákkalıev ýaqyt beldeýin burynǵy qalpyna keltirý múmkin emes ekenin aıtty. Al 2 qyrkúıekte Shyǵys Qazaqstan oblysynyń ákimi Ermek Kósherbaev aımaqtaǵy ýaqyt beldeýin qaıta qaraý máselesin Saýda mınıstrligi qarap jatqanyn málimdedi. Bul turǵyndardyń ózgeriske baılanysty kóptep shaǵymdanýymen baılanysty bolǵan.
