باتىس قازاقستان وبلىسىنىڭ بوكەيوردا اۋدانىندا، ۇيالى اۋىلىنىڭ ماڭىنا بەلگىسىز ۇشۋ اپپاراتى قۇلادى. ونى جەرگىلىكتى تۇرعىندار تاۋىپ العان، دەپ حابارلايدى "ادىرنا" ۇلتتىق پورتالى «موي گورود» باسىلىمىنا سىلتەمە جاساپ.
انىقتالعان نىساننىڭ ۇزىندىعى – 120 سانتيمەتر. وقيعا ورنىنا پوليتسيا مەن قۇتقارۋشىلار بارىپ، تەكسەرۋ جۇمىستارىن جۇرگىزدى.
باسىلىمنىڭ مالىمەتىنشە، كۋاگەرلەر تۇسىرگەن سۋرەتتەرگە قاراعاندا، بۇل فرانتسۋزدىق Sagem كومپانياسى ازىرلەگەن Crecerelle بارلاۋ درونى بولۋى مۇمكىن. بوكەيوردا اۋدانى اكىمدىگى دروننىڭ قۇلاعانىن راستاعانىمەن، بۇل تۋرالى پىكىر بىلدىرۋدەن باس تارتتى.
ال بقو پوليتسيا دەپارتامەنتىنىڭ مالىمەتىنشە، قۇلاعان نىسانعا بايلانىستى تەكسەرۋ جۇمىستارى باستالعان.
"بوكەيوردا اۋدانى، ۇيالى اۋىلى ماڭىندا پيلوتسىز ۇشۋ اپپاراتىنا ۇقساس زاتتىڭ قۇلاۋىنا بايلانىستى پوليتسيا دەپارتامەنتى ۋاكىلەتتى ورگاندارمەن بىرلەسىپ تەكسەرۋ جۇرگىزۋدە", – دەپ حابارلادى ۆەدومستۆو.
ايتا كەتەيىك، بوكەيوردا اۋدانىندا 1946 جىلدان بەرى جۇمىس ىستەيتىن "كاپۋستين يار" اسكەري پوليگونى ورنالاسقان. قازىرگى ۋاقىتتا بۇل اۋماقتى رەسەيدىڭ قورعانىس مينيسترلىگى جالعا الىپ وتىر. پوليگون اۋدان جەرىنىڭ 49,1 پايىزىن قامتيدى.
«موي گورود» باسىلىمىنىڭ مالىمەتىنشە، اۋداندا زىمىران مەن ۇشۋ اپپاراتتارىنىڭ سىنىقتارىنىڭ قۇلاۋى ءجيى كەزدەسەدى.
