قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين استانا مەن كيەۆ كاسپي قۇبىر كونسورتسيۋمىنىڭ (ققك) مۇناي ايداۋ ستانتسياسىنا دروندارمەن جاسالعان شابۋىلدىڭ سالدارىن ديپلوماتيالىق جولمەن شەشەتىنىن مالىمدەدى، دەپ حابارلايدى "ادىرنا" ۇلتتىق پورتالى.
ء"بىز بۇل جاعداي تۋرالى حاباردارمىز. قازاقستاننىڭ ەنەرگەتيكا مينيسترلىگى مالىمدەمە جاساپ، شابۋىل جاسالعانىنا قاراماستان، مۇناي بۇرىنعى كولەمدە ايدالىپ جاتقانىن ايتتى. ارينە، ءبىز ۋكراين تاراپىمەن سويلەسەمىز، كەلىسسوزدەر جۇرگىزەمىز، كەزدەسۋلەر وتەدى. مۇنداي جاعدايدىڭ قايتالانباۋى ءۇشىن بۇل ماسەلەنى مىندەتتى تۇردە ديپلوماتيالىق جولمەن شەشۋىمىز كەرەك", – دەدى راحمەتۋللين.
ەسكە سالا كەتەيىك، 17 اقپانعا قاراعان ءتۇنى كراسنودار ولكەسىنىڭ كاۆكاز اۋدانىنداعى "كروپوتكينسكايا" مۇناي ايداۋ ستانتسياسىنا جەتى درونمەن شابۋىل جاسالدى. ستانتسيا جەدەل تۇردە جۇمىسىن توقتاتىپ، تەڭىز – نوۆوروسسيسك باعىتى بويىنشا مۇناي تاسىمالداۋ اپاتتىق سحەماعا اۋىستىرىلدى. نىسان قاتتى زاقىمدانعانى ايتىلدى.
رەسەيلىك "ترانسنەفت" كومپانياسى شابۋىلدىڭ سالدارىن جويۋعا 1,5-2 اي قاجەت بولاتىنىن، بۇل قازاقستاننان تاسىمالداناتىن مۇناي كولەمىنىڭ شامامەن 30%-عا تومەندەۋىنە الىپ كەلۋى مۇمكىن ەكەنىن حابارلادى.
ۋكراينا ارمياسىنىڭ باس شتابى 17 اقپانعا قاراعان ءتۇنى كراسنودار ولكەسىندەگى يلسك مۇناي وڭدەۋ زاۋىتىنا سوققى جاسالعانىن راستادى. ولار نىساندا اۋقىمدى ءورت بولعانىن مالىمدەدى.
