ءماجىلىس دەپۋتاتى ەدىل جاڭبىرشين قر پرەمەر-ءمينيسترى ولجاس بەكتەنوۆكە جولداعان دەپۋتاتتىق ساۋالىندا بۇرالقى يتتەر ماسەلەسىن كوتەرىپ، ونى شەشۋ ءۇشىن ۇكىمەت شۇعىل شارالار قابىلداۋى كەرەكتىگىن ايتتى.
دەپۋتات ءوز سوزىندە ماڭعىستاۋ وبلىسىندا 16 جاستاعى بالانىڭ يتكە تالانىپ، اۋىر جاراقات العان وقيعاسىن مىسالعا كەلتىرىپ، مۇنداي جاعدايلاردىڭ جيىلەپ كەتكەنىن اتاپ ءوتتى. ونىڭ ايتۋىنشا، ەلىمىزدە جىل سايىن 38 مىڭنان استام ادامدى يت قابادى، ال ونىڭ كەمىندە جارتىسى – 14 جاسقا دەيىنگى بالالار.
ەدىل جاڭبىرشين جانۋارلاردى قورعاۋشى كەيبىر ۇيىمداردىڭ ادام قاۋىپسىزدىگىن ەلەمەي، بۇرالقى يتتەردى قورعاۋعا باسىمدىق بەرىپ وتىرعانىن سىنعا الدى.
"بۇرالقى يتتەر تۋرالى ءسوز بولسا، جانۋارلار قۇقىعىن قورعاۋشى كەيبىر ۇيىمدار ورە تۇرادى. تۇسىنەمىز، ولار يۋسايد سياقتى باتىستىق ۇيىمداردان العان گرانتتارىنىڭ اقشاسىن اقتاۋى كەرەك بولار. بىراق، جانۋارلار قۇقىعى ادام قۇقىعىنان جوعارى بولعانى ما؟!" – دەدى دەپۋتات.
وسىعان بايلانىستى، ەدىل جاڭبىرشين ۇكىمەتكە كەلەسى شارالاردى قابىلداۋدى ۇسىندى:
بىرىنشىدەن، جانۋارلاردى قورعاۋشى ۇيىمداردىڭ قارجىلاندىرۋ كوزدەرىن تەكسەرۋ.
ەكىنشىدەن، ازاماتتاردى، پارلامەنت دەپۋتاتتارى مەن مەملەكەتتىك قىزمەتكەرلەردى الەۋمەتتىك جەلىلەردە بالاعاتتاپ، جالا جابۋ ارەكەتتەرىن زەرتتەۋ.
ۇشىنشىدەن، بۇرالقى يتتەردى جاپپاي اۋلاپ، جۇقپالى اۋرۋلار تاراتاتىن جانە اگرەسسيا كورسەتەتىندەرىن ەۆتانازيالاۋ.
دەپۋتات «جانۋارلارعا جاۋاپكەرشىلىكپەن قاراۋ تۋرالى» زاڭعا وزگەرىستەر ەنگىزۋ قاجەتتىگىن ايتتى. ۇسىنىلعان جاڭا نورمالارعا سايكەس، يەسىز يتتەر 15 كۇن ىشىندە يەسى تابىلماسا، ەۆتانازيا ادىسىمەن ۇيىقتاتىلادى.
مۇنداي ءادىس اقش، جاپونيا، فرانتسيا، ۇلىبريتانيا سياقتى ەلدەردە قولدانىلاتىنىن اتاپ وتكەن دەپۋتات، ەڭ الدىمەن ادام ءومىرى مەن قاۋىپسىزدىگى باستى ورىندا بولۋى ءتيىس ەكەنىن باسا ايتتى.
