شىڭجاڭداعى ەتنيكالىق قازاقتاردىڭ قىسىمعا ۇشىراۋ ماسەلەسىن العاش كوتەرگەن "اتاجۇرت ەرىكتىلەرى" ۇيىمىن الماتى قالالىق ادىلەت دەپارتامەنتى تىركەۋدەن وتكىزدى. بۇل اقپاراتتى ازاتتىق تىلشىسىنە ۇيىمنىڭ قازىرگى جەتەكشىسى ەربول داۋلەتبەكۇلى ايتتى.
ۇيىم بۇعان دەيىن بىرنەشە رەت تىركەۋگە ءوتىنىش بەرىپ، تىركەلە الماعان ەدى. دەپارتامەنت وكىلدەرى "قۇجاتتارىنىڭ دۇرىس ەمەس" ەكەنىن ايتسا، ۇيىم مۇشەلەرى "ماسەلەنىڭ ساياسي استارى بارىن" ايتىپ بولجاعان. قىركۇيەك ايىندا ۇيىمنىڭ دەپارتامەنتتى سوتقا بەرگەنى بەلگىلى بولعان.
- 12 قىركۇيەك كۇنى دەپارتامەنتتى سوتقا بەرگەنىمىز تۋرالى ءباسپاسوز جيىنىن وتكىزدىك. 14-ءى كۇنى ءبىزدى دەپارتامەنتكە شاقىرىپ الىپ، "جارعىلارىڭدا تۇزەتۋ ەنگىزەتىن جەرلەر بار. سونى وزگەرتىپ اكەلسەڭىزدەر، تىركەپ بەرەمىز" دەدى. ءبىز "جارايدى، ەگەر تىركەسەڭىزدەر ارىزىمىزدى قايتىپ الامىز" دەدىك. مىنە، تىركەۋ قۇجاتىمىزدى قولىمىزعا الدىق، - دەدى ۇيىم جەتەكشىسى.
ۇيىمنىڭ بەرگەن تالاپ ارىزى بويىنشا بۇگىن، 25 قىركۇيەكتە سوت وتىرىسى ءوتۋى ءتيىس بولعان. ەربول داۋلەتبەكۇلى ساعات 15:30-عا بەلگىلەنگەن سوت وتىرىسىنا بارىپ، تالاپ-ارىزدارىن قايتارىپ الاتىنىن جەتكىزدى.
الماتى قالالىق ادىلەت دەپارتامەنتىنىڭ زاڭدى تۇلعالاردى تىركەۋ ءبولىمىنىڭ جەتەكشىسى اقەركە قوجاحمەتقىزى ازاتتىققا "اتاجۇرت ەرىكتىلەرى" ۇيىمىن 24 قىركۇيەكتە تىركەگەنىن راستادى. ونىڭ ايتۋىنشا، "ۇيىم بۇعان دەيىن قۇجاتتا جىبەرگەن قاتەلىكتەردىڭ ءبارىن جويعان".
"اتاجۇرتى ەرىكتىلەرى" ۇيىمى 2017 جىلدان بەرى تۇراقتى جۇمىس ىستەپ كەلەدى. قىتايداعى از ۇلتتاردىڭ قىسىمعا ۇشىراۋى تۋرالى ايتىپ جۇرگەن ۇيىمنىڭ بۇرىنعى جەتەكشىسى سەرىكجان بىلاشقا ناۋرىز ايىندا "الەۋمەتتىك الاۋىزدىق تۋدىردى" دەگەن ايىپ تاعىلىپ، بىرنەشە اي نۇر-سۇلتاندا ۇيقاماقتا وتىردى. ونىڭ ىسىنە حالىقارالىق ۇيىمدار رەاكتسيا ءبىلدىردى. قازاقستاننىڭ تۇكپىر-تۇكپىرىندە ءبىلاشتى بوساتۋدى تالاپ ەتكەن اكتسيالار وتتى.
تامىز ايىندا الماتى قالاسى اۋەزوۆ اۋداندىق سوتى ونى قاماۋدان بوساتىپ، 110 مىڭ تەڭگە (شامامەن 288 دوللار) كولەمىندە ايىپپۇل سالدى. سەرىكجان ءبىلاش ۇستالعاننان كەيىن ۇيىمعا ەربول داۋلەتبەكۇلى جەتەكشىلىك ەتىپ كەلەدى.
"ازاتتىق" راديوسى
