Shyńjańdaǵy etnıkalyq qazaqtardyń qysymǵa ushyraý máselesin alǵash kótergen "Atajurt eriktileri" uıymyn Almaty qalalyq ádilet departamenti tirkeýden ótkizdi. Bul aqparatty Azattyq tilshisine uıymnyń qazirgi jetekshisi Erbol Dáýletbekuly aıtty.
Uıym buǵan deıin birneshe ret tirkeýge ótinish berip, tirkele almaǵan edi. Departament ókilderi "qujattarynyń durys emes" ekenin aıtsa, uıym músheleri "máseleniń saıası astary baryn" aıtyp boljaǵan. Qyrkúıek aıynda uıymnyń departamentti sotqa bergeni belgili bolǵan.
- 12 qyrkúıek kúni departamentti sotqa bergenimiz týraly baspasóz jıynyn ótkizdik. 14-i kúni bizdi departamentke shaqyryp alyp, "jarǵylaryńda túzetý engizetin jerler bar. Sony ózgertip ákelseńizder, tirkep beremiz" dedi. Biz "jaraıdy, eger tirkeseńizder aryzymyzdy qaıtyp alamyz" dedik. Mine, tirkeý qujatymyzdy qolymyzǵa aldyq, - dedi uıym jetekshisi.
Uıymnyń bergen talap aryzy boıynsha búgin, 25 qyrkúıekte sot otyrysy ótýi tıis bolǵan. Erbol Dáýletbekuly saǵat 15:30-ǵa belgilengen sot otyrysyna baryp, talap-aryzdaryn qaıtaryp alatynyn jetkizdi.
Almaty qalalyq ádilet departamentiniń zańdy tulǵalardy tirkeý bóliminiń jetekshisi Aqerke Qojahmetqyzy Azattyqqa "Atajurt eriktileri" uıymyn 24 qyrkúıekte tirkegenin rastady. Onyń aıtýynsha, "uıym buǵan deıin qujatta jibergen qatelikterdiń bárin joıǵan".
"Atajurty eriktileri" uıymy 2017 jyldan beri turaqty jumys istep keledi. Qytaıdaǵy az ulttardyń qysymǵa ushyraýy týraly aıtyp júrgen uıymnyń burynǵy jetekshisi Serikjan Biláshqa naýryz aıynda "áleýmettik alaýyzdyq týdyrdy" degen aıyp taǵylyp, birneshe aı Nur-Sultanda úıqamaqta otyrdy. Onyń isine halyqaralyq uıymdar reakııa bildirdi. Qazaqstannyń túkpir-túkpirinde Biláshti bosatýdy talap etken akııalar ótti.
Tamyz aıynda Almaty qalasy Áýezov aýdandyq soty ony qamaýdan bosatyp, 110 myń teńge (shamamen 288 dollar) kóleminde aıyppul saldy. Serikjan Bilásh ustalǵannan keıin uıymǵa Erbol Dáýletbekuly jetekshilik etip keledi.
"Azattyq" radıosy
