ەلىمىزدە سۋ تاسقىنىن بولجاۋ جۇيەسى وندىرىستىك قولدانىسقا بەرىلدى. بۇل تۋرالى بۇگىن، 18 اقپاندا سۋ رەسۋرستارى جانە يرريگاتسيا مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
"ەلىمىزدە Tasqyn سۋ تاسقىنىن بولجاۋ جانە مودەلدەۋ جۇيەسى وندىرىستىك قولدانىسقا بەرىلدى. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ سۋ تاسقىنى كەزەڭىنە دايىندىق ماسەلەلەرى بويىنشا اپپارات كەڭەسىن وتكىزدى",- دەلىنگەن اقپاراتتا.
ۆەدومستۆو دەرەگىنشە، بۇگىنگى تاڭدا وزەندەردىڭ 128 ۋچاسكەسىندەگى 142 سۋ بەكەتى بويىنشا سۋ تاسقىنىن مودەلدەۋ جۇرگىزىلەدى. "قازسۋشار" فيليالدارى مەن باسسەيندىك ينسپەكتسيالاردىڭ 114 مامانى سۋ بەكەتتەرى بويىنشا دەرەكتەرگە كۇندەلىكتى تالداۋ جاسايدى جانە ونى جۇيەگە ەنگىزەدى.
"Tasqyn جۇيەسى جاھاندىق GloFAS سۋ تاسقىنى جونىندە ەسكەرتۋ جۇيەسىنە بىرىكتىرىلگەن. Tasqyn 2025 جىلدىڭ سۋ تاسقىنى كەزەڭىنە سوڭعى بولجامدى ناۋرىز ايىنىڭ باسىندا بەرەدى", دەدى سۋ رەسۋرستارى جانە يرريگاتسيا مينيسترلىگى.
مينيستر نۇرجان نۇرجىگىتوۆتىڭ ايتۋىنشا، سۋ تاسقىنىنا ەل ىشىندەگى دايىندىقتان بولەك، ءبىز كورشى مەملەكەتتەردەگى ارىپتەستەرىمىزبەن دە تۇراقتى بايلانىستامىز.
"اقپارات الماسۋ جەدەل جۇرەدى. كوكتەمگى سۋ تاسقىنىن قابىلداۋعا قويمالاردا بوس ورىن دايىنداۋ ءۇشىن سۋ تاستاۋ جۇمىسى جالعاسىپ جاتىر. بۇگىنگى تاڭدا ەلىمىزدىڭ سۋ قويمالارى 13 ملرد تەكشە مەتر سۋ قابىلداي الادى",- دەپ ناقتىلادى ول.
