كوكتەمگى سۋ تاسقىنىنا دايىندىق اياسىندا ۇلىتاۋ وبلىسىنىڭ اكىمى داستان رىسپەكوۆ سۋ باسۋ قاۋپى جوعارى ەلدى مەكەندەردى ارالاپ، جۇرگىزىلىپ جاتقان جۇمىستاردى باقىلاپ، جاۋاپتى مەكەمەلەرگە ناقتى تاپسىرمالار بەردى. تەكسەرۋ بارىسىندا اكىم قابىلدانىپ جاتقان شارالاردىڭ تيىمدىلىگىنە نازار اۋدارىپ، جۇمىس قارقىنىن ارتتىرۋدى تالاپ ەتتى.
الدىمەن، جەزدى وزەنىنىڭ 2 شاقىرىمدىق اۋماعىندا جۇرگىزىلىپ جاتقان ساناتسيا جۇمىستارى تەكسەرىلدى. اكىم جاعالاۋلاردى نىعايتۋدى جانە سۋ وتكىزۋ جۇيەلەرىن رەتكە كەلتىرۋ بويىنشا تاپسىرمالار بەردى. بارلىق جۇمىستار ەكى اپتا ىشىندە تولىق اياقتالۋى ءتيىس.
سونىمەن قاتار، داستان رىسپەكوۆ «جەزقازعان – پەتروپاۆلوۆسك» رەسپۋبليكالىق ماڭىزى بار اۆتوجولىنىڭ قازىرگى جاعدايىمەن تانىستى. جەزقازعان – ۇلىتاۋ باعىتىنداعى جوندەۋ جۇمىستارىن جەدەلدەتۋ تاپسىرىلدى. سونداي-اق، ۇلىتاۋ وبلىسى بويىنشا «قازاۆتوجول» ۇك» اق فيليالىنىڭ باسشىلىعىنا جولداردىڭ جاي-كۇيىن تۇراقتى باقىلاۋدا ۇستاپ، قار تازالاۋ جۇمىستارىن كۇشەيتۋ جونىندە تاپسىرما بەرىلدى.
اكىم شەڭبەر اۋىلىنا باراتىن جولمەن ءجۇرىپ ءوتىپ، اۆتوجولدىڭ جاعدايىن تەكسەردى. قاردان تولىق تازارتىلماعان جول ۋچاسكەلەرىن قىسقا مەرزىمدە رەتكە كەلتىرۋ جانە تۇرعىندار ءۇشىن قولايلى جاعداي جاساۋ تاپسىرىلدى.
سونىمەن قاتار، قاراكەڭگىر، العاباس، مالشىباي اۋىلدارىنداعى كوپىرلەردىڭ تەحنيكالىق جاعدايى تەكسەرىلدى. انىقتالعان اقاۋلاردى جەدەل جويۋ جانە سۋ وتكىزۋ ارنالارى مەن درەناج جۇيەلەرىن تازارتۋ جۇمىستارىن جەدەلدەتۋ جونىندە تاپسىرمالار بەرىلدى.
اتاپ وتەيىك، د. رىسپەكوۆ ۇلىتاۋ وبلىسىنىڭ اۋماعىنداعى جول - العاباس اۋىلىنان قورعالجىن اۋدانىنا دەيىنگى جول جوندەۋ بويىنشا جسق دايىنداۋ تاپسىردى.
اتالعان جۇمىستاردىڭ ورىندالۋى وبلىس اكىمىنىڭ جەكە باقىلاۋىندا بولادى. ەكى اپتا ىشىندە قايتا تەكسەرۋ جۇرگىزىلىپ، جۇمىستاردىڭ بارىسى باعالانادى.
