بۇگىن، 17 اقپاندا الماتى قالاسى قالالىق جوسپارلاۋ جانە ۋربانيستيكا باسقارماسىنىڭ ەكس-باسشىسى الماسحان احمەدجانوۆ 11 جىلعا سوتتالدى، دەپ حابارلايدى «ادىرنا» ءتىلشىسى.
سوت احمەدجانوۆتى قر قىلمىستىق كودەكسىنىڭ 28-بابىنىڭ 5-بولىگى، 190-بابىنىڭ 4-بولىگى، 361-بابىنىڭ 1 جانە 4-بولىگى بويىنشا كىنالى دەپ تانىدى. ەر ادام جازاسىن ورتاشا قاۋىپسىزدىك مەكەمەسىندە وتەيدى. سونداي-اق وعان مەملەكەتتىك قىزمەتتە جۇمىس ىستەۋگە ءومىر بويىنا تىيىم سالىندى.
سوت وتىرىسىندا احمەدجانوۆ وزىنە تاعىلعان ايىپتاردى مويىندامايتىنىن جانە ايىپتاۋ اكتىسىن تۇسىنبەيتىنىن مالىمدەدى.
سوت ۇكىمى بويىنشا بۇرىنعى باس ساۋلەتشىمەن بىرگە ايىپتالعان تاعى دا بىرنەشە لاۋازىمدى تۇلعالار سوتتالدى.
الماتى قالاسى جەر قاتىناستارى باسقارماسىنىڭ ەكس-باسشىسى ارداق سامامبەتوۆ 10 جىلعا باس بوستاندىعىنان ايىرىلدى. ال جەر قاتىناستارى باسقارماسىنىڭ جەرگە ورنالاستىرۋ، جەردى الۋ جانە رەزەرۆكە قويۋ ءبولىمىنىڭ بۇرىنعى باسشىسى ەرلان جارمۇحامبەتوۆكە 14 جىل جازا كەسىلدى. باعالاۋ كومپانياسىنىڭ باسشىسى المازحان باكيروۆ 8 جىلعا سوتتالدى. مۇحانبەتالى شالقاربەكوۆ پەن بەرىك ۇسكەمباەۆ – كاسىپكەرلەر، 5 جىلعا شارتتى تۇردە سوتتالدى.
ەسكە سالايىق، بۇل ءىستىڭ تەرگەۋى 2023 جىلدىڭ ماۋسىمىندا الماتىداعى تاۋ بوكتەرىندەگى قۇرىلىستارداعى سىبايلاس جەمقورلىق تاۋەكەلدەرىن تالداۋ ناتيجەسىندە باستالعان ەدى.
