تانىمال كىتاپحاناشى عازيزا قۇدايبەرگەنقىزى ۇلتتىق كىتاپحانانىڭ ديرەكتورى بولىپ تاعايىندالدى، دەپ حابارلايدى «ادىرنا» ءتىلشىسى.
«2022 جىلعى قاڭتار قىرعىنىندا شىندىقتى ايتقانىم ءۇشىن جۇمىستان شىعىپ قالدىم. سول جىلى مەن «مۇقاعالي عاسىرى» اتتى كىتابىمدى جازۋ ءۇشىن قىزمەتىمدى تاستاپ، ەكى گازەتپەن كەلىسىمشارتقا تۇرىپ، ازعانتاي قالاماقى الىپ، ناپاقامدى تاۋىپ، وتباسىمدى اسىراپ جاتقان ەدىم. قاڭتاردان سوڭ اينالاسى ءبىر اي ىشىندە ەكى باسىلىم دا كەلىسىمشارتىمدى توقتاتىپ تاستادى. وسىنداي قيىن مەزگىلدە بيلىككە جاقپايتىن ازاماتتىق پوزيتسيام مەن ساياسي كوزقاراسىما قاراماستان، مەنى جۇمىسقا شاقىرعان ءبىر عازيز جان بولدى، ول – عازيزا قۇدايبەرگەنقىزى. ءۇش جىلعا تاياۋ ۋاقىتتا عازيزانىڭ قولداۋىنىڭ ارقاسىندا الاڭسىز جۇمىس ىستەپ، «الەم ادەبيەتى» باعدارلاماسىن جۇزەگە اسىرىپ 30-عا جۋىق ءدارىس وقىدىم. مىنە، بۇگىن سول ابزال جان باسقا قىزمەتكە اۋىسىپ، الماتىداعى ۇلتتىق كىتاپحانانىڭ باسشىسى بولىپ تاعايىندالىپتى. جاڭا قىزمەتىڭىز قۇتتى بولسىن، عازيزا حانىم! سىزگە بارلىق جاقسىلىقتى تىلەيمىن. ابىرويىڭىز ارتا بەرسىن!»— دەپ قۇتتىقتادى ادەبيەت سىنشىسى امانگەلدى كەڭشىلىك.
بۇعان دەيىن عازيزا قۇدايبەرگەنقىزى استاناداعى قر ۇلتتىق اكادەميالىق كىتاپحاناسىنىڭ ديرەكتورى لاۋازىمىن اتقارعان ەدى.
