اباي وبلىسىنىڭ جاڭا اكىمى بولىپ بەرىك ءۋالي تاعايىندالدى. بۇل تۋرالى بۇگىن، 17 اقپاندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
بۇعان دەيىن ول پرەزيدەنت كەڭەسشىسى ءارى ءباسپاسوز حاتشىسى قىزمەتىن اتقارعان بولاتىن.
بەرىك ءۋالي 1977 جىلى سەمەي وبلىسىندا دۇنيەگە كەلگەن. ت.جۇرگەنوۆ اتىنداعى قازاق مەملەكەتتىك تەاتر جانە كينو ينستيتۋتىن "كينوتانۋشى", ءال-فارابي اتىنداعى قازاق ۇلتتىق ۋنيۆەرسيتەتىن "جۋرناليستيكا" (ماگيستراتۋرا), سونداي-اق قازاق يننوۆاتسيالىق گۋمانيتارلىق-زاڭ ۋنيۆەرسيتەتىن "قۇقىقتانۋ" ماماندىقتارى بويىنشا بىتىرگەن.
ەڭبەك جولىن 1997 جىلى "تاڭ" تەلەكومپانياسىندا "الماتى جاڭالىقتارى" اقپاراتتىق باعدارلاماسىنىڭ ءتىلشىسى بولىپ باستاعان. 1998-1999 جىلدارى – "نتك" تەلەارناسىندا "جاڭالىقتار" اقپاراتتىق باعدارلاماسىنىڭ شىعارۋشى رەداكتورى، 2000-2007 جىلدارى – "31 كانال" تەلەراديوكومپانياسىندا" "ينفورمبيۋرو" اقپاراتتىق باعدارلاماسىنىڭ باس رەداكتورى، "ەركىن ءسوز" باعدارلاماسىنىڭ اۆتورى ءارى جۇرگىزۋشىسى، "دودا" ساياسي توك-شوۋىنىڭ باس رەداكتورى ءارى جۇرگىزۋشىسى، 2007-2012 جىلدارى – "حابار" اگەنتتىگى" اق اقپاراتتىق باعدارلامالار ديرەكتسياسى جاڭالىقتار قىزمەتىنىڭ ءتىلشىسى، "بەتپە-بەت" اقپاراتتىق-ساراپتامالىق باعدارلاماسىنىڭ جۇرگىزۋشىسى بولدى.
ەسكە سالايىق، 2022 جىلى باق بەتتەرىندە بەرىك ءۋاليدىڭ شقو اكىمى بولىپ تاعايىندالعانى تۋرالى اقپارات تاراعان ەدى. كەيىن اقوردا مالىمدەمە جاساپ، مالىمەتتىڭ جالعان ەكەنىن مالىمدەدى.
2025 جىلعى 15 اقپاندا دا الەۋمەتتىك جەلىدە اباي وبلىسىنداعى اكىمنىڭ بوس لاۋازىمىنا پرەزيدەنتتىڭ كەڭەسشىسى ءارى ءباسپاسوز حاتشىسى بەرىك ءۋاليدىڭ كانديدات رەتىندە ۇسىنىلاتىنى تۋرالى اقپارات تاراعان بولاتىن.
