اقش پەن رەسەي اراسىنداعى ۋكرايناداعى سوعىستى توقتاتۋ تۋرالى كەلىسسوزدەر 18 اقپان كۇنى ساۋد ارابياسىندا وتەدى. بۇل تۋرالى امەريكالىق «Axios» پورتالى جازدى، دەپ حابارلايدى «ادىرنا» ءتىلشىسى.
شەتەلدىك باق-تىڭ مالىمەتىنشە، اقش اتىنان مەملەكەتتىك حاتشى مارك رۋبيو, پرەزيدەنتتىڭ ۇلتتىق قاۋىپسىزدىك جونىندەگى كەڭەسشىسى مايك ۋولتس جانە پرەزيدەنتتىڭ تاياۋ شىعىس جونىندەگى ارنايى ۋاكىلى ستيۆ ۋيتكوفف قاتىسادى.
رەسەي دەلەگاتسياسىنىڭ ناقتى قۇرامى بەلگىسىز. بۇعان دەيىن رەسەي سىرتقى ىستەر ءمينيسترى سەرگەي لاۆروۆ ساۋد ارابياسىنا بارعالى جاتقانى تۋرالى مالىمەت جاريالانعان.
ايتا كەتەيىك، 15 اقپاندا ۋكراينا پرەزيدەنتى ۆلاديمير زەلەنسكي ساۋد ارابياسىندا وتەتىن كەزدەسۋگە قاتىسپايتىنىن مالىمدەگەن ەدى.
