استاناداعى بەينەباقىلاۋ جۇيەسىنەن «سەرگەك» كەتىپ جاتىر. ونىڭ ورنىنا جاڭا جۇيەنى ءباا كومپانياسى ەنگىزەدى. بۇل تۋرالى ەلوردا ءماسليحاتىنىڭ كەزەكتەن تىس سەسسياسىندا استانا قالاسى تسيفرلاندىرۋ جانە مەملەكەتتىك قىزمەت باسقارماسىنىڭ باسشىسى ديدار سۇلەيمەنوۆ مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، «سەرگەك» جوباسىن جاساۋشى «كوركەم تەلەكوم» كومپانياسىنىڭ استانا اكىمدىگىمەن اراداعى مەملەكەتتىك-جەكەمەنشىك ارىپتەستىك ء(مجا) كەلىسىمى اياقتالدى. اكىمدىك كەلىسىمدى ۇزارتپاۋ تۋرالى شەشىم قابىلدادى.
“2017 جىلى «سەرگەك» جوباسى جۇزەگە اسىرىلدى. بيىلدىڭ 13 ناۋرىزىندا «كوركەم تەلەكوم» كومپانياسىمەن كەلىسىمشارت مەرزىمى اياقتالادى. مەملەكەت باسشىسىنىڭ تاپسىرماسى اياسىندا جانە جوبانى ودان ءارى دامىتۋ تۇرعىسىندا G42 حولدينگىنە كىرەتىن Presight حالىقارالىق كومپانياسىمەن ەلوردا ءۇشىن جاساندى ينتەللەكت نەگىزىندە قالالىق ينفراقۇرىلىمدى باسقارۋدىڭ جوبالىق شەشىمىن ىسكە اسىرۋ جۇمىسىن اتقاردىق. جاڭا جوبانى قالىپتاستىرۋ كەزىندە قازىرگى قولدانىستاعى جۇيەنىڭ كەمشىلىكتەرى ەسكەرىلدى”، - دەدى ديدار سۇلەيمەنوۆ.
ەندى Presignt كومپانياسى 2025-2030 جىلدار ارالىعىندا قالاداعى بەينەباقىلاۋ جۇيەسىن دامىتۋعا جاۋاپتى بولادى. جوباعا 53 ملرد تەڭگە قارجى بولىنەدى.
نەگىزگى مىندەتتەرى:
- «اقىلدى قالا» (Smart City) تۇجىرىمداماسىن دامىتۋ
- قاۋىپسىزدىكتى ارتتىرۋ
- جولداعى ءتارتىپتى قاداعالاۋ
جوبانىڭ 100% شىعىنىن جەكە كومپانيا كوتەرەدى، ال 60%-ىن قازاقستاندىق كاسىپورىندار قامتاماسىز ەتەدى. Presignt تولەمدەردى تەك جوبا ىسكە قوسىلعاننان كەيىن عانا الادى.
قالاداعى قولدانىستاعى بەينەكامەرالار جاڭا وپەراتورعا ءبىر اي ىشىندە بەرىلەدى.
ايتا كەتسەك، «سەرگەك» جوباسى 2017 جىلى مەملەكەتتىك-جەكەمەنشىك ارىپتەستىك نەگىزىندە ىسكە قوسىلدى. «كوركەم تەلەكوم» كومپانياسى 8,4 ملرد تەڭگە جەكە ينۆەستيتسيا سالدى، ال اكىمدىك 24,9 ملرد تەڭگە تولەگەن ەدى.
