«سەرگەك» كامەرالارى جول ەرەجەسىن بۇزۋشىلارمەن قاتار كارانتين كەزىندە توتەنشە جاعداي رەجيمىن ساقتاماعانداردى دا قاداعالاپ وتىرادى. بۇل تۋرالى نۇر-سۇلتان قالالىق پوليتسيا دەپارتامەنتى مالىمدەدى، دەپ حابارلايدى قازاقپارات.
«تەكسەرۋ جۇرگىزۋشىگە قاتىستى جۇرگىزىلەدى. كولىكتى توقتاتقان كەزدە پوليتسيا قىزمەتكەرلەرى «سەرگەك-پاترۋل» بازاسىنا جۇرگىزۋشى مەن كولىكتىڭ مالىمەتتەرىن، اتاپ ايتقاندا جسن، كولىكتىڭ مەملەكەتتىك نومەرىن جانە جۇرگىزۋشىنىڭ ايتۋىنشا ونىڭ تۇرعىلىقتى جانە جۇمىس ورنىنىڭ مەكەن-جايىن تىركەيدى»، - دەدى ۆەدومستۆو.
ال ءدال سول جۇرگىزۋشىنى كەلەسى جولى توقتاتىپ، تەكسەرۋ بارىسىندا اقپاراتتىق بازادا تىركەلگەن مالىمەتتەر ساي كەلمەسە، وندا ول جازاعا تارتىلادى.
بۇل رەتتە ەگەر جۇرگىزۋشى ازىق-تۇلىك نەمەسە ءدارى-دارمەك الۋعا بارعان بولسا، وندا قر اكىمشىلىك قۇقىق بۇزۋ تۋرالى كودەكستىڭ 476-بابىمەن (توتەنشە جاعداي رەجيمىن بۇزۋ) اكىمشىلىك جاۋاپكەرشىلىككە تارتىلمايدى.
«ءبىرىنشى رەت ەسكەرتۋ بەرىلەدى. ال ەكىنشى رەت نۇر-سۇلتان قالالىق مامانداندىرىلعان اۋدانارالىق اكىمشىلىك سوتىنىڭ شەشىمىنە سايكەس، 10 اەك-تەن 15 تاۋلىككە دەيىن جازا قاراستىرىلعان. نۇر-سۇلتان قالاسىنىڭ پوليتسيا دەپارتامەنتى توتەنشە جاعداي رەجيمىن بۇزباۋدى جانە ونى ساقتاۋدى ەسكەرتەدى» دەپ اتاپ ءوتتى دەپارتامەنت.
