2024 jyldyń 25 jeltoqsanynda Bakýden Groznyıǵa ushqan Embraer 190 ushaǵynyń Aqtaýdaǵy apat aldyndaǵy borttaǵy dybys jazbalary tarap ketti. Ázerbaıjan ushaǵy sońǵy jarty saǵatta Aqtaý áýejaıynan komanda alǵany belgili boldy. Reseılik Baza saıty jarııalaǵan bort jazbasy oqıǵanyń egjeı-tegjeıi men qıyn jaǵdaıdaǵy ushqyshtardyń áreketin kórsetedi, biraq reseılik saıt ony óz yńǵaıyna beıimdep usynýǵa tyrysqan dep habarlaıdy “Adyrna” ulttyq portaly.
Jazbadaǵy derekke qaraǵanda ushaq sońǵy 2 saǵat boıy apatty jaǵdaıdy bastan keshirgen. Groznyıǵa qoný aldynda ushaq kabınasynda GPS sıgnaly joǵalyp, ekıpaj arasynda úreı týǵyzǵan. Ushaq keıin Mıneralnye vody, sosyn Mahachkala áýejaılaryna bet alǵan. Apat aldyndaǵy sońǵy 26 mınýtta Aqtaý áýejaıymen baılanysta bolǵany, sonyń ózinde baılanystyń jıi úzilip, qosylǵany baıqalady.
Aqtaý áýejaıy munarasyndaǵy dıspetcher ushaqtyń qaýipsiz qonýyna qajetti sharalardy ýaqtyly qabyldaýǵa tyrysqan. Sóz arasynda qoný alańynyń jaryqtary jaǵylǵany aıtylady.
Jazbadaǵy derekter sońǵy eki saǵatta ushqyshtardyń borttaǵy jaǵdaıǵa alańdaǵanyn, ottegi tapshylyǵyn boldyrmaý úshin tómen ushqanyn kórsetedi. Al Aqtaý áýejaıyna jaqyndaǵanda ushqyshtar qoný jolaǵyn birden kórmese kerek, jolaqty bár sátke avtomobıl jolymen shatastyrǵany baıqalady.
Sońǵy eki saǵat ushqyshtardyń jantalasyp, barynsha ushaqtaǵy qaýipsizdikti saqtaýǵa tyrysqanyn kórsetedi. Ushqyshtardyń biriniń tájirıbesizdigi de baıqalǵan. Apatty jaǵdaıdaǵy ushaqty basqarýdaǵy balama áreketter qolǵa alynǵan. Biraq sonyń bárine qaramastan, ushaq qonar kezinde apatqa ushyraǵan.
Apat kezinde ushaqta 67 adam bolǵan, onyń 38-i qaıtys boldy. Bul ekıpajdardyń qıyn jaǵdaılarda jumys isteýge durys daıyndalýynyń mańyzdylyǵyn jáne áýe kemelerindegi qaýipsizdik júıelerin jaqsartýdyń qajettiligin kórsetedi.
