«قازمۇنايگاز» اق باسقارما توراعاسى ماعزۇم مىرزاعاليەۆ پەن ەنەرگەتيكا ۆيتسە-ءمينيسترى جاندوس نۇرماعانبەتوۆ ماەك-تەگى اپاتتان كەيىن سوگىس الادى. بۇل تۋرالى پرەمەر-مينيستر ءاليحان سمايىلوۆ مەملەكەت باسشىسى قاسىم-جومارت توقاەۆقا ايتتى، - دەپ حابارلايدى "ادىرنا" ءتىلشىسى اقوردانىڭ ءباسپاسوز قىزمەتىنە سىلتەمە جاساپ.
سمايىلوۆ ەلىمىزدىڭ بيىلعى 6 ايداعى الەۋمەتتىك-ەكونوميكالىق دامۋ قورىتىندىسى، سونداي-اق ماڭعىستاۋ اتوم ەنەرگەتيكالىق كومبيناتىندا (ماەك) جانە اتىراۋ مۇناي وڭدەۋ زاۋىتىندا ء(اموز) بولعان اپاتتاردىڭ سەبەپتەرىن تەكسەرۋ ناتيجەلەرى جونىندە باياندادى.
سمايىلوۆتىڭ ايتۋىنشا، باتىس وڭىرىندەگى ەنەرگەتيكالىق جۇيەنىڭ جاي-كۇيىن كەڭەيتىلگەن تالداۋ ناتيجەسىندە ەنەرگەتيكا كاسىپورىندارىنىڭ جۇمىسىندا بىرقاتار جۇيەلى كەمشىلىكتەر انىقتالعان. سونىمەن قاتار، ەنەرگەتيكا مينيسترلىگى، «KEGOC» اق، «ماەك» جشس جانە «قازمۇنايگاز» ۇك» اق جۇمىسىندا ولقىلىقتار انىقتالدى.
«قازمۇنايگاز» اق باسقارما توراعاسى ماعزۇم مىرزاعاليەۆكە مۇناي وڭدەۋ زاۋىتىنىڭ قاۋىپسىز جانە تۇراقتى جۇمىسىن قامتاماسىز ەتۋ بويىنشا شارالاردى ۋاقتىلى ورىنداماعانى ءۇشىن سوگىس جاريالانادى.
سونىمەن قاتار، باتىس ەنەرگەتيكالىق حابىنىڭ قاۋىپسىزدىگىنە باقىلاۋدى السىرەتكەنى ءۇشىن ەنەرگەتيكا ۆيتسە-ءمينيسترى جاندوس نۇرماعانبەتوۆكە سوگىس بەرۋ تۋرالى شەشىم قابىلداندى. سونداي-اق «ماەك» جشس، «اتىراۋ مۇناي وڭدەۋ زاۋىتى»، «KEGOC» اق بىرقاتار باسشىلارى مەن لاۋازىمدى تۇلعالارىنا قاتىستى اكىمشىلىك شارالار قولدانىلادى، دەلىنگەن حابارلامادا.
سونىمەن قاتار، مۇنداي داعدارىس جاعدايلارىنا جول بەرمەۋ ءۇشىن ماڭعىستاۋ اتوم ەنەرگەتيكالىق كومبيناتىنا جاڭعىرتۋ جانە كۇردەلى جوندەۋ جۇرگىزۋ، باتىس ەنەرگەتيكالىق ايماعىن كۇشەيتۋ، اتىراۋ مۇناي وڭدەۋ زاۋىتىن سىرتقى ەلەكتر قۋاتىمەن تۇراقتى قامتاماسىز ەتۋ جانە سول جەردە ءوزىن-ءوزى ەنەرگيامەن قامتاماسىز ەتەتىن ستانسا سالۋ، باتىس ايماعىن قازاقستاننىڭ بىرىڭعاي ەلەكترەنەرگەتيكالىق جۇيەسىنە قوسۋ جۇمىستارىن جانە باسقا دا بىرقاتار شۇعىل جانە جۇيەلى شارالاردى جۇزەگە اسىرادى.
مەملەكەت باسشىسىنا ۆەگەتاتسيالىق كەزەڭى سۋ تاپشىلىعى جاعدايىندا ءوتىپ جاتقان وڭتۇستىك وڭىرلەردى سۋمەن قامتاماسىز ەتۋ ماسەلەسى تۋرالى مالىمەت بەرىلدى. وسىعان بايلانىستى ۇكىمەت پەن جەرگىلىكتى اتقارۋشى ورگاندار قاجەتتى شارالار قابىلداپ جاتىر. اتاپ ايتقاندا، سۋمەن قامتاماسىز ەتۋ ءۇشىن سۋارمالى اۋىل شارۋاشىلىعى داقىلدارىنىڭ قايسىسىنا باسىمدىق بەرىلەتىنى انىقتالادى، سۋاينالىم ءادىسى قولدانىلادى. بۇدان بولەك، سۋ ۇنەمدەۋ تەحنولوگياسىن ەنگىزۋ جۇمىستارى بەلسەندى جۇزەگە اسىرىلۋدا. ارنالارداعى سۋ شىعىنىن ازايتۋ جانە جيناقتالاتىن سۋ مولشەرىن كوبەيتۋ ءۇشىن گيدروتەحنيكالىق قۇرىلىستارعا كۇردەلى جوندەۋ جۇمىستارى جۇرگىزىلىپ جاتىر.
ايتا كەتەيىك، بۇل مىرزاعاليەۆكە بەرىلگەن ەكىنشى سوگىس. «قازمۇنايگازدىڭ» ءبىرىنشى باسشىسى 2022 جىلدىڭ تامىزىندا ديزەلدىك وتىنمەن قامتاماسىز ەتۋ بويىنشا دەر كەزىندە شارا قولدانباعانى ءۇشىن سوگىس العان بولاتىن. ودان كەيىن كوميسسيا وتاندىق مۇناي بازالارىنىڭ ديزەل وتىنىن بولشەك قۇنىنان جوعارى باعاعا ساتۋ فاكتىلەرىن تىركەدى، بۇل وڭىرلەردە جانارماي ساتۋ كولەمىنىڭ تومەندەۋىنە اكەلدى، ويتكەنى ونى ساتىپ الۋ جانارماي قۇيۋ ستانتسيالارى ءۇشىن ءتيىمسىز بولدى. سونىمەن قاتار، «قازمۇنايگاز»، «پەتروسۋن» جانە مۇناي وڭدەۋ زاۋىتتارىنىڭ گەنەراتسيا، ماركەتينگ جانە لوگيستيكا سالاسىنداعى جۇيەلىك ولقىلىقتار مەن كەمشىلىكتەر انىقتالدى.
مىرزاعاليەۆپەن بىرگە وسى جىلدىڭ ءساۋىر ايىندا قىزمەتىنەن بوساتىلعان ەنەرگەتيكا ۆيتسە-ءمينيسترى اسەت ماعاۋوۆقا سوگىس جاريالاندى.
"ادىرنا" ۇلتتىق پورتالى
