14 اقپان تۇندە استانادا ەسكى ۆوكزال ماڭىندا جويقىن جارىلىس بولدى. بۇل تۋرالى قتج ءباسپاسوز قىزمەتى راستادى، دەپ حابارلايدى “ادىرنا” ۇلتتىق پورتالى.
كۋاگەرلەردىڭ الەۋمەتتىك جەلىلەردە جاريالاعان حابارلامالارى بويىنشا، جارىلىس تولقىنى جاقىن اۋدانداردىڭ تۇرعىندارىنا دا سەزىلگەن، كەي جەرلەردە ءتىپتى تەرەزەلەر سىنعان.
قتج ءباسپاسوز قىزمەتىنىڭ مالىمەتىنشە، استانا ستانساسىنىڭ سۇرىپتاۋ جولىندا جۇك كونتەينەرىندە جارىلىس بولعان.
«الدىن الا اقپارات بويىنشا، كونتەينەردە ەلەكتروقۇرال-جابدىقتارى (ترانسفورماتورلار، گەنەراتورلار) بولعان. قۇربان بولعاندار مەن جاراقات العاندار جوق. كونتەينەر جەكە كومپانياعا تيەسىلى. قۇزىرەتتى ورگانداردىڭ قاتىسۋىمەن تەرگەۋ باستالدى»، - دەپ حابارلادى ءباسپاسوز قىزمەتى.
استانا قالالىق تجد ءباسپاسوز قىزمەتى وقيعا ورنىنا تەز ارادا قۇتقارۋشىلار جەتكەنىن ايتتى. وقيعا ناتيجەسىندە ءبىر ادام قولىنان جەڭىل جاراقات العان. جەدەل مەديتسينالىق كومەك بريگاداسى وقيعا ورنىندا كومەك كورسەتتى، اۋرۋحاناعا جاتقىزۋ قاجەت بولمادى. وقيعانىڭ سەبەپتەرى مەن جاعدايلارى انىقتالىپ جاتىر.
