اقتاۋدا 18 جاستاعى اقىل-ەسى كەمىستىگى بار جىگىتتى زورلادى دەگەن كۇدىكتى ءالى دە انىقتالماعان. جابىرلەنۋشىنىڭ اناسى قىلمىستىق ءىستىڭ باياۋ تەرگەلىپ جاتقانىن ايتىپ، كىنالى ازاماتتىڭ بوستاندىقتا جۇرگەنىنە نارازى. ول ىشكى ىستەر مينيسترلىگىنەن ءىستى ەرەكشە باقىلاۋعا الۋدى تالاپ ەتۋدە، دەپ حابارلايدى "ادىرنا" ۇلتتىق پورتالى.
ينفورمبيۋرو جاڭالىقتار قىزمەتىنىڭ اقپاراتىنشا، بەلگىسىز ەر ادام ونى كوشەدەن كولىگىنە وتىرعىزىپ الىپ كەتىپ، تەڭىز جاعاسىنا اپارىپ، زورلاعان. كەيىن دالاعا تاستاپ، قاشىپ كەتكەن. وقيعا 27 جەلتوقساندا بولعان.
جابىرلەنۋشىنىڭ اناسى ورازگۇل قونىسوۆا ءتارتىپ ساقشىلارىنىڭ ارەكەتىنە كوڭىلى تولمايتىنىن جەتكىزدى. ونىڭ ايتۋىنشا، تەرگەۋ باستالعانىنا ءبىر ايدان اسسا دا، كۇدىكتىنىڭ جەكە باسى انىقتالماعان.
ماڭعىستاۋ وبلىستىق پوليتسيا دەپارتامەنتىنىڭ مالىمەتىنشە، قىلمىستىق كودەكستىڭ 121-بابى ("سەكسۋالدىق سيپاتتاعى زورلىق-زومبىلىق ارەكەتتەرى") بويىنشا تەرگەۋ جۇرگىزىلۋدە. قاجەتتى ساراپتامالار تاعايىندالىپ، بەينەباقىلاۋ كامەرالارىنداعى جازبالار زەرتتەلىپ جاتىر. پوليتسيا قىلمىستىق ءىستىڭ دەپارتامەنت باسشىلىعىنىڭ باقىلاۋىندا ەكەنىن مالىمدەدى. قازىرگى ۋاقىتتا كۇدىكتىنى انىقتاۋ جانە ۇستاۋ شارالارى جالعاسىپ جاتىر.
ال ادۆوكات اجار ءابدىل اقتاۋدا بالا كەزىنەن مۇگەدەكتىگى بار 18 جاستاعى جىگىتتىڭ ىسىندە كوپتەگەن تۇسىنىكسىز جايتتار بار ەكەنىن حابارلادى. قورعاۋشى قۇقىق قورعاۋ ورگاندارى بۇل وقيعاعا قاتىستى تۇسىنىكتەمە بەرىپ، جان-جاقتى تەرگەۋ جۇرگىزەدى دەپ ۇمىتتەنەتىنىن ايتتى.
"28 جەلتوقسانعا قاراعان ءتۇنى، شامامەن 02:00-دە، جابىرلەنۋشىنىڭ اناسىنىڭ ايتۋىنشا، ول پوليتسياعا بارىپ، قىلمىس تۋرالى ارىز جازباق بولعان. الايدا ونىڭ ارىزى قابىلدانباعان. ول ۇلىمەن بىرگە ۇيىنە قايتىپ كەلەدى. كەيىن، شامامەن 04:00-دە، ونى پوليتسيا تەرگەۋگە الىپ كەتەدى. دەگەنمەن جابىرلەنۋشىنىڭ پروكتولوگ ماماننان تەكسەرۋدەن ءوتۋى تەك 2025 جىلعى 2 قاڭتاردا، ياعني زورلىقتان بەس كۇن وتكەننەن كەيىن عانا جۇرگىزىلگەن. مۇنداي ماڭىزدى جايتتارعا قالايشا وسىنشالىق نەمقۇرايدى، جاۋاپسىز قاراۋعا بولادى؟
مەن پوليتسيا بۇل ماسەلەگە تۇسىنىكتەمە بەرىپ، جان-جاقتى تەرگەۋ جۇرگىزەدى دەپ شىن جۇرەكتەن سەنگىم كەلەدى. جابىرلەنۋشىنىڭ اناسىندا بىردە-ءبىر پروتسەسسۋالدىق قۇجات جوق. ءبىز بۇل ءىستىڭ قالاي ءجۇرىپ جاتقانى تۋرالى مۇلدەم بەيحابارمىز. پوليتسيا دەپارتامەنتى بارلىق ساراپتاما تاعايىندالدى دەپ تۇسىنىكتەمە بەرىپ جاتىر، بىراق جابىرلەنۋشىگە قاتىستى سوت-پسيحولوگيالىق ساراپتاما ءالى جۇرگىزىلگەن جوق. بۇل ستاندارتتى پروتسەدۋرا عوي. كەز كەلگەن كۋرسانت جەكە تۇلعاعا قارسى قىلمىس جاسالعان جاعدايدا سوت-پسيحولوگيالىق ساراپتاما تاعايىنداۋ مىندەتتى ەكەنىن جاتقا بىلەدى. بۇل ءىس بويىنشا كوپتەگەن تۇسىنىكسىز جايتتار بار", - دەيدى اجار ءابدىل الەۋمەتتىك جەلىدەگى پاراقشاسىندا.
