اقتاۋ اۋەجايىندا اۋە كەمەلەرىنە تەحنيكالىق قىزمەت كورسەتۋ جانە جوندەۋ ورتالىعى سالىنادى. بۇل تۋرالى كولىك ءمينيسترى مارات قاراباەۆ 23 جەلتوقساندا ماجىلىستە وتكەن جيىندا ايتتى، دەپ حابارلايدى “ادىرنا” ۇلتتىق پورتالى.
ءمينيستردىڭ ايتۋىنشا، جوندەۋ جانە وقۋ بازاسىن تۇرىك كومپانيالارى YDA, Turkish Technic جانە ASFAT سالۋدى جوسپارلاپ وتىر.
«تەحنيكالىق قىزمەت كورسەتۋ ورتالىعى قازاقستان، رەسەي جانە ورتالىق ازيا ەلدەرىنىڭ ازاماتتىق جانە اسكەري اۋە كەمەلەرىنە قىزمەت كورسەتەتىن بولادى. مەملەكەتىمىزدىڭ، رەسەي فەدەراتسياسىنىڭ، وزبەكستاننىڭ، تۇركىمەنستاننىڭ، قىرعىزستاننىڭ جانە تاجىكستاننىڭ ازاماتتىق اۆياتسياسىنىڭ 411 جولاۋشى ۇشاعى بار»، - دەدى مينيستر.
كاراباەۆتىڭ پىكىرىنشە، اقتاۋ اۋەجايى — پەرسپەكتيۆتى مۋلتيمودالدى اۆياتسيالىق حاب.
«ونىڭ باستى ارتىقشىلىعى – كولىكتىڭ بارلىق تۇرلەرىنە قولجەتىمدىلىك جانە ەۋروپاعا جاقىندىعى – بار بولعانى 3 ساعاتتىق رەيس. جاڭعىرتۋ ناتيجەسىندە اۋەجايدىڭ جۇك تاسىمالداۋ مۇمكىندىگى جىلىنا 200 مىڭ تونناعا دەيىن ارتىپ، جىلدىق اينالىمى 520 ميلليارد تەڭگەنى قۇرايتىن بولادى»، - دەدى قاراباەۆ.
ەسكە سالساق، 2024 جىلدىڭ ساۋىرىندە قازاقستاننىڭ پرەمەر-ءمينيسترى ولجاس بەكتەنوۆ تۇركيا پرەزيدەنتى رەجەپ تايىپ ەردوعانمەن كەزدەستى. كەزدەسۋگە YDA Holding قۇرىلىس كومپانيالار توبىنىڭ باسقارما توراعاسى حۋسەين ارسلان دا قاتىستى. جيىندا قازاقستان مەن تۇركيا اراسىنداعى بىرلەسكەن جوبالار تالقىلاندى. بۇعان دەيىن YDA تۇركىستان حالىقارالىق اۋەجايىن سالعان بولاتىن.
