اقش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن رەسەي مەن ۋكراينا اراسىنداعى سوعىستى توقتاتۋ ءۇشىن كەلىسسوزدەردى جەدەل باستاۋ تۋرالى سويلەسكەنىن مالىمدەدى، دەپ حابارلايدى "ادىرنا" ۇلتتىق پورتالى.
«ءبىز كوماندالارىمىزدىڭ كەلىسسوزدەردى دەرەۋ باستايتىنى جونىندە كەلىستىك جانە اۋەلى ۋكراينا پرەزيدەنتى ۆلاديمير زەلەنسكيگە قوڭىراۋ شالىپ، بۇل اڭگىمە تۋرالى حابارلاۋدان باستايمىز. مەن مۇنى ءدال قازىر جاسايمىن»، – دەپ جازدى ترامپ ءوزىنىڭ الەۋمەتتىك جەلىدەگى پاراقشاسىندا.
ترامپتىڭ ايتۋىنشا، ول پۋتينمەن تەك ۋكراينا ماسەلەسىن عانا ەمەس، سونداي-اق تاياۋ شىعىستى، ەنەرگەتيكانى، جاساندى ينتەللەكتتى، دوللاردىڭ كۇشىن جانە باسقا دا تاقىرىپتاردى تالقىلاعان.
«ءبىز ەكى ەلدىڭ ۇلى تاريحى تۋرالى وي جۇگىرتتىك جانە ەكىنشى دۇنيەجۇزىلىك سوعىستا بىرلەسىپ ءساتتى كۇرەسكەنىمىزدى ەسكە الدىق. رەسەي ونداعان ميلليون ادامىنان ايىرىلدى. ءبىز دە كوپتەگەن ازاماتىمىزدى جوعالتتىق. ءبىز حالىقتارىمىزدىڭ كۇشتى جاقتارى تۋرالى اڭگىمەلەستىك جانە ىنتىماقتاستىقتىڭ بىزگە قانشالىقتى پايدا اكەلەتىنىن تالقىلادىق. بىراق ەڭ الدىمەن، ءبىز ەكەۋىمىز دە كەلىسكەندەي، رەسەي مەن ۋكراينا اراسىنداعى سوعىستا بولىپ جاتقان ميلليونداعان ءولىمدى توقتاتقىمىز كەلەدى»، – دەدى ترامپ.
«ءبىز ءبىر-ءبىرىمىزدىڭ ەلدەرىمىزگە ساپارمەن بارۋ مۇمكىندىگىن قوسا العاندا، وتە تىعىز ىنتىماقتاسۋعا كەلىستىك. مەن مەملەكەتتىك حاتشى ماركو رۋبيونى، ورتالىق بارلاۋ باسقارماسىنىڭ ديرەكتورى دجون رەتكليففتى، ۇلتتىق قاۋىپسىزدىك جونىندەگى كەڭەسشى مايكل ۋولتتستى جانە ەلشى ءارى ارنايى وكىل ستيۆ ۋيتكوففتى كەلىسسوزدەرگە جەتەكشىلىك ەتۋگە شاقىردىم. مەن بۇل كەلىسسوزدەردىڭ ءساتتى بولاتىنىنا نىق سەنىمدىمىن. ەگەر مەن پرەزيدەنت بولعانىمدا، بۇل سوعىس باستالماس ەدى، بىراق ول باستالىپ كەتتى، سوندىقتان ونى توقتاتۋ قاجەت» - دەپ قوستى ترامپ .
ترامپ تەلەفون ارقىلى سويلەسكەنى ءۇشىن پۋتينگە العىسىن ءبىلدىردى.
