AQSh prezıdenti Donald Tramp Reseı prezıdenti Vladımır Pýtınmen Reseı men Ýkraına arasyndaǵy soǵysty toqtatý úshin kelissózderdi jedel bastaý týraly sóıleskenin málimdedi, dep habarlaıdy "Adyrna" ulttyq portaly.
«Biz komandalarymyzdyń kelissózderdi dereý bastaıtyny jóninde kelistik jáne áýeli Ýkraına prezıdenti Vladımır Zelenskııge qońyraý shalyp, bul áńgime týraly habarlaýdan bastaımyz. Men muny dál qazir jasaımyn», – dep jazdy Tramp óziniń áleýmettik jelidegi paraqshasynda.
Tramptyń aıtýynsha, ol Pýtınmen tek Ýkraına máselesin ǵana emes, sondaı-aq Taıaý Shyǵysty, energetıkany, jasandy ıntellektti, dollardyń kúshin jáne basqa da taqyryptardy talqylaǵan.
«Biz eki eldiń uly tarıhy týraly oı júgirttik jáne Ekinshi dúnıejúzilik soǵysta birlesip sátti kúreskenimizdi eske aldyq. Reseı ondaǵan mıllıon adamynan aıyryldy. Biz de kóptegen azamatymyzdy joǵalttyq. Biz halyqtarymyzdyń kúshti jaqtary týraly áńgimelestik jáne yntymaqtastyqtyń bizge qanshalyqty paıda ákeletinin talqyladyq. Biraq eń aldymen, biz ekeýimiz de keliskendeı, Reseı men Ýkraına arasyndaǵy soǵysta bolyp jatqan mıllıondaǵan ólimdi toqtatqymyz keledi», – dedi Tramp.
«Biz bir-birimizdiń elderimizge saparmen barý múmkindigin qosa alǵanda, óte tyǵyz yntymaqtasýǵa kelistik. Men memlekettik hatshy Marko Rýbıony, ortalyq barlaý basqarmasynyń dırektory Djon Retklıffty, ulttyq qaýipsizdik jónindegi keńesshi Maıkl Ýoltty jáne elshi ári arnaıy ókil Stıv Ýıtkoffty kelissózderge jetekshilik etýge shaqyrdym. Men bul kelissózderdiń sátti bolatynyna nyq senimdimin. Eger men prezıdent bolǵanymda, bul soǵys bastalmas edi, biraq ol bastalyp ketti, sondyqtan ony toqtatý qajet» - dep qosty Tramp .
Tramp telefon arqyly sóıleskeni úshin Pýtınge alǵysyn bildirdi.
