اقمولا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى اتباسار قالاسىنداعى تۇزەۋ كولونياسىنىڭ 12 قىزمەتكەرىنە قاتىستى اقتاۋ ۇكىمىن شىعاردى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەمە جاساپ.
ولارعا بەلسەندى تيمۋر دانەباەۆ پەن تاعى 43 سوتتالۋشىنى ازاپتادى دەگەن ايىپ تاعىلعان بولاتىن.
سوت وتىرىسى القابيلەردىڭ قاتىسۋىمەن ءوتتى. بۇعان دەيىن مەملەكەتتىك ايىپتاۋشى ءبىر ايىپتالۋشىعا - جەتى جىل، قالعاندارىنا التى جىل باس بوستاندىعىنان ايىرۋ جازاسىن سۇراپ، ارنايى اتاقتارىنان ايىرۋدى جانە ءۇش جىل مەملەكەتتىك قىزمەتتە جۇمىس ىستەۋگە تىيىم سالۋدى ۇسىنعان ەدى.
بۇل ءىس بويىنشا سوت 2024 جىلعى 31 شىلدەدە باستالدى.
2023 جىلعى 8 قىركۇيەكتە اتباسار كولونياسىندا ازاپتاۋ ارەكەتتەرىن كورسەتەتىن ۆيدەو تاراعاننان كەيىن، قىلمىستىق-اتقارۋ جۇيەسى كوميتەتىنىڭ توراعاسى جانات ەشماعامبەتوۆ كولونيانىڭ توعىز قىزمەتكەرى جۇمىستان بوساتىلعانىن، تاعى ەكەۋى مەديتسينالىق دەمالىستان كەيىن جۇمىستان شىعاتىنىن مالىمدەدى. سونىمەن قاتار، كولونيا باسشىسى مەن ونىڭ ورىنباسارى، سونداي-اق وبلىستىق قىلمىستىق-اتقارۋ جۇيەسى دەپارتامەنتى باسشىسىنىڭ ورىنباسارى قىزمەتىنەن بوساتىلدى.
2023 جىلعى 30 قىركۇيەكتە تيمۋر دانەباەۆ استاناداعى تەرگەۋ يزولياتورىنا اۋىستىرىلدى. 2024 جىلعى قاڭتاردا ول يزولياتوردا قىسىم كورىپ جاتقانىن، مەديتسينالىق كومەك كورسەتىلمەي، باسقا مەكەمەگە اۋىستىرۋمەن قورقىتىلعانىن حابارلادى.
2023 جىلعى 13 قاراشادا سوتتا دانەباەۆ وزىنە قىسىم كورسەتىلگەنى تۋرالى ايتىپ بەردى. ونىڭ ايتۋىنشا، ونى دارەتحانانىڭ ەدەنىن جۋعا ماجبۇرلەگەن، ال باس تارتقان سوڭ اياۋسىز سوققىعا جىققان. بۇل وقيعا تۇسىرىلگەن ۆيدەو 2023 جىلعى 3 قىركۇيەكتە الەۋمەتتىك جەلىلەردە تارالدى.
«ءار سوققى وتكەن سايىن اۋرۋ كۇشەيە ءتۇستى. جاي عانا ءۇنسىز قالۋ مۇمكىن ەمەس ەدى. مەن ءتىپتى ايقايلاعان جوقپىن، شىڭعىردىم. مەنى ەش سەبەپسىز ۇردى، مەن مۇنداي قاتىگەزدىككە لايىق بولمادىم»، – دەدى سول كەزدە دانەباەۆ.
ايىپتالۋشىلاردىڭ ۇشەۋى قاماۋدا وتىرسا، قالعاندارى كەپىلمەن بوستاندىقتا بولدى. بۇعان دەيىن دانەباەۆ قوسىمشا ادامداردى جاۋاپقا تارتۋ تۋرالى جانە ايىپتالۋشىلاردى كەپىلدەن قاماۋعا اۋىستىرۋ تۋرالى ءوتىنىش بەرگەن. الايدا سوت ونى قاناعاتتاندىرمادى.
تيمۋر دانەباەۆ 2022 جىلعى قاڭتار وقيعالارى كەزىندە قازاقستان پرەزيدەنتى قاسىم-جومارت توقاەۆتىڭ «20 مىڭ تەرروريست» تۋرالى مالىمدەمەسىنە قاتىستى جاۋاپقا تارتۋدى تالاپ ەتكەن ەدى. 2023 جىلعى ماۋسىمدا استانا قالاسىنىڭ №2 الماتى اۋداندىق سوتى ونى ۇلتارالىق ارازدىقتى قوزدىردى دەگەن ايىپپەن ءۇش جىلعا باس بوستاندىعىنان ايىردى. ءبىر جىل وتكەن سوڭ، جوعارعى سوت ونىڭ ۇكىمىن قايتا قاراۋدان باس تارتىپ، وعان نەگىز تاپپاعانىن مالىمدەدى.
قازاقستاندىق قۇقىق قورعاۋشىلار مەن ەۋروپارلامەنتتىڭ ورتالىق ازياداعى ادام قۇقىقتارى جونىندەگى قارارىندا دانەباەۆ ساياسي تۇتقىنداردىڭ ءبىرى رەتىندە اتالىپ، ونى بوساتۋعا شاقىرىلعان.
