Aqmola oblysynyń qylmystyq ister jónindegi mamandandyrylǵan aýdanaralyq soty Atbasar qalasyndaǵy túzeý kolonııasynyń 12 qyzmetkerine qatysty aqtaý úkimin shyǵardy, dep habarlaıdy "Adyrna" ulttyq portaly QazTAG agenttigine silteme jasap.
Olarǵa belsendi Tımýr Dánebaev pen taǵy 43 sottalýshyny azaptady degen aıyp taǵylǵan bolatyn.
Sot otyrysy alqabılerdiń qatysýymen ótti. Buǵan deıin memlekettik aıyptaýshy bir aıyptalýshyǵa - jeti jyl, qalǵandaryna alty jyl bas bostandyǵynan aıyrý jazasyn surap, arnaıy ataqtarynan aıyrýdy jáne úsh jyl memlekettik qyzmette jumys isteýge tyıym salýdy usynǵan edi.
Bul is boıynsha sot 2024 jylǵy 31 shildede bastaldy.
2023 jylǵy 8 qyrkúıekte Atbasar kolonııasynda azaptaý áreketterin kórsetetin vıdeo taraǵannan keıin, Qylmystyq-atqarý júıesi komıtetiniń tóraǵasy Janat Eshmaǵambetov kolonııanyń toǵyz qyzmetkeri jumystan bosatylǵanyn, taǵy ekeýi medıınalyq demalystan keıin jumystan shyǵatynyn málimdedi. Sonymen qatar, kolonııa basshysy men onyń orynbasary, sondaı-aq oblystyq qylmystyq-atqarý júıesi departamenti basshysynyń orynbasary qyzmetinen bosatyldy.
2023 jylǵy 30 qyrkúıekte Tımýr Dánebaev Astanadaǵy tergeý ızolıatoryna aýystyryldy. 2024 jylǵy qańtarda ol ızolıatorda qysym kórip jatqanyn, medıınalyq kómek kórsetilmeı, basqa mekemege aýystyrýmen qorqytylǵanyn habarlady.
2023 jylǵy 13 qarashada sotta Dánebaev ózine qysym kórsetilgeni týraly aıtyp berdi. Onyń aıtýynsha, ony dárethananyń edenin jýýǵa májbúrlegen, al bas tartqan soń aıaýsyz soqqyǵa jyqqan. Bul oqıǵa túsirilgen vıdeo 2023 jylǵy 3 qyrkúıekte áleýmettik jelilerde taraldy.
«Ár soqqy ótken saıyn aýrý kúsheıe tústi. Jaı ǵana únsiz qalý múmkin emes edi. Men tipti aıqaılaǵan joqpyn, shyńǵyrdym. Meni esh sebepsiz urdy, men mundaı qatygezdikke laıyq bolmadym», – dedi sol kezde Danebaev.
Aıyptalýshylardyń úsheýi qamaýda otyrsa, qalǵandary kepilmen bostandyqta boldy. Buǵan deıin Dánebaev qosymsha adamdardy jaýapqa tartý týraly jáne aıyptalýshylardy kepilden qamaýǵa aýystyrý týraly ótinish bergen. Alaıda sot ony qanaǵattandyrmady.
Tımýr Dánebaev 2022 jylǵy qańtar oqıǵalary kezinde Qazaqstan prezıdenti Qasym-Jomart Toqaevtyń «20 myń terrorıst» týraly málimdemesine qatysty jaýapqa tartýdy talap etken edi. 2023 jylǵy maýsymda Astana qalasynyń №2 Almaty aýdandyq soty ony ultaralyq arazdyqty qozdyrdy degen aıyppen úsh jylǵa bas bostandyǵynan aıyrdy. Bir jyl ótken soń, Joǵarǵy sot onyń úkimin qaıta qaraýdan bas tartyp, oǵan negiz tappaǵanyn málimdedi.
Qazaqstandyq quqyq qorǵaýshylar men Eýroparlamenttiń Ortalyq Azııadaǵy adam quqyqtary jónindegi qararynda Danebaev saıası tutqyndardyń biri retinde atalyp, ony bosatýǵa shaqyrylǵan.
