بۇگىن جەتىسۋ وبلىسىندا حالىقتىڭ الەۋمەتتىك وسال توپتارى ساناتىنان جانە كوپ بالالى وتباسىلاردان 23 شاڭىراق جاڭا قونىس قۋانىشىنا كەنەلدى. كەزەكتە تۇرعاندارعا وبلىس ورتالىعىنىڭ جاڭا تۇرعىن ءۇي الابىندا ءۇش بولمەلى ۇيلەردىڭ كىلتى تابىستالدى.
جاڭا قونىس يەلەرىنىڭ اراسىندا كوپ بالالى جانە تولىق ەمەس وتباسىلار، مۇگەدەك بالالاردى تاربيەلەپ وتىرعان وتباسىلار، ءى جانە ءىى توپتاعى مۇگەدەكتەر، زەينەتكەرلەر بار.
تالدىقورعان قالاسى اكىمدىگىنىڭ مالىمەتىنشە، «جاستار-3» شاعىن اۋدانىندا تۇرعىن ۇيلەردىڭ قۇرىلىسى وتكەن جىلدىڭ شىلدە ايىنان باستاپ جۇرگىزىلگەن بولاتىن. ءسويتىپ كەزەكتە تۇرعاندار ءۇشىن جالعا بەرىلەتىن 56 جاڭا ءۇي سالىنىپ، ساتىپ الىندى. بۇگىن كىلتتەرى تابىستالعان 23 ۇيدەن باسقا 33 ءۇي اقپان ايىنىڭ سوڭىنا دەيىن قولدانىسقا بەرىلەدى. ءار ءۇيدىڭ جالپى اۋدانى 76 شارشى مەتر. مۇندا ءۇش تۇرعىن بولمە، اس ءۇي مەن جۋىناتىن بولمە بار. ايتا كەتەرلىگى، بيىلعى جىلدىڭ سوڭىنا دەيىن وسى تۇرعىن اۋداندا جەكە قۇرىلىس سالۋشىلار ەسەبىنەن تاعى 150-گە جۋىق ءۇي پايدالانۋعا بەرىلەدى دەگەن جوسپار بار.
جاڭا ۇيگە يە بولعانداردىڭ ءبىرى كوپ بالالى انا ينديرا يمانبولوۆا:
- تۇرعىن ۇيگە كەزەگىندە 10 جىلدان استام ۋاقىت تۇردىق. باسپانا جالداۋدىڭ قۇنى دا ءبىز ءۇشىن ارزانعا تۇسپەيدى، وعان قوسا ءجيى كوشۋدىڭ ءوز ماشاقاتى بار. اسىرەسە بالالارىم قينالىپ كەتەتىن. ەندى، مىنە، ءوز باسپانامىزعا قول جەتكىزدىك، قۋانىشىمىزدا شەك جوق، - دەيدى التى بالانىڭ اناسى ي. يمانبولوۆا.
تۇرعىن ءۇي كەزەگىندە تۇرعان مەرۋەرت ابدىقادىروۆا دا جاڭا باسپاناعا قول جەتكىزدى. قونىستوي يەسىنىڭ اناسى قۋانىشىن جاسىرماي:
- قىزىم ون ەكى جارىم جىل دەگەندە ءۇي الىپ وتىر. التى بالاسى بار. بۇعان دەيىن جالدامالى پاتەردە تۇرىپ جۇرگەن. قازىر مەرۋەرتتىڭ ءۇيلى بولعانىنا جاقىن جاندارى، ءبارىمىز قۋانىپ جاتىرمىز، - دەيدى كۇپان ابدىقادىروۆا.
ەسكە سالساق، بۇعان دەيىن، ياعني وسى جىلدىڭ باسىندا تالدىقورعانداعى 49 كوپ بالالى وتباسىنا «بەرەكە» كوتتەدج قالاشىعىنداعى تۇرعىن ۇيلەردىڭ كىلتى تابىستالعان بولاتىن.
جالپى وتكەن جىلى تالدىقورعاندا 1283 وتباسى تۇرعىن ۇيمەن قامتىلىپ، كەزەك 8,3%-عا تومەندەسە، وسى جىلى تاعى 1483 وتباسى تۇرعىن ۇيگە قول جەتكىزەدى. 1041 پاتەرلىك 28 ءۇيدىڭ، 107 كوتتەدجدىڭ قۇرىلىسى اياقتالادى جانە حالىقتىڭ الەۋمەتتىك وسال توپتارى ءۇشىن 300 پاتەر ساتىپ الىنادى. ءسويتىپ، 2023-2025 جىلدارى وبلىس ورتالىعىندا 5 مىڭعا جۋىق كەزەكتە تۇرعاندار تۇرعىن ۇيمەن قامتاماسىز ەتىلەدى.
