"اكىم بولۋدى قالامايتىن" بلوگەر اكىمشىلىك جازاعا تارتىلدى

1065
Adyrna.kz Telegram

جەتىسۋ وبلىسىندا اۋىل اكىمى كرەسلوسىندا ۆيدەو تۇسىرگەن بلوگەرگە اكىمشىلىك جازا تاعايىندالدى، دەپ حابارلايدى "ادىرنا" ۇلتتىق پورتالى.

بەلگىلى بولعانداي، ءىس تالدىقورعان قالاسىنىڭ اكىمشىلىك سوتىندا قارالدى.

بۇعان دەيىن جەلىدە بلوگەردىڭ اكىم كرەسلوسىندا وتىرىپ الىپ، مەملەكەتتىك جۇمىس تۋرالى ءسوز سويلەگەن ۆيدەوسى تاراعان بولاتىن.

جەتىسۋ وبلىستىق سوتىنىڭ ءباسپاسوز قىزمەتى حابارلاعانداي، ۆيدەو 20 اقپان كۇنى ساعات 18:00 شاماسىندا قارابۇلاق اۋىلىندا تۇسىرىلگەنى انىقتالدى. گ. ەسىمدى ازامات ەسكەلدى اۋدانى قارابۇلاق اۋىلدىق وكرۋگى اكىمىنىڭ كەڭسەسىندە وتىرىپ، بەينەجازباعا ءتۇسىرىپ، Instagram جەلىسىندە باسقالارعا قۇرمەتسىزدىك كورسەتكەن.

«قۇقىق بۇزۋشىلىق – ۇساق بۇزاقىلىق پوليتسيا ينسپەكتورىنىڭ قۇقىق بۇزۋشىلىقتى تىركەۋ تۋرالى حاتتاماسىمەن، اكىمشىلىك قۇقىق بۇزۋشىلىق تۋرالى حاتتامامەن، پروتسەسكە قاتىسۋشىلاردىڭ جازباشا جانە اۋىزشا تۇسىنىكتەمەلەرىمەن راستالادى. سوت وتىرىسىندا ەر ادام ءوز كىناسى مەن قۇقىق بۇزۋشىلىق جاساعانىن مويىنداپ، سوتتان ونى قاتاڭ جازالاماۋدى سۇرادى. سوت گ.-عا قاتىستى اكىمشىلىك جازانى تاعايىنداۋ كەزىندە كىناسىن مويىنداۋ مەن جاسالعان قۇقىق بۇزۋشىلىقتىڭ سيپاتىن ەسكەرە وتىرىپ، بۇزاقى 20 اەك (73 مىڭ 840 تەڭگە) مولشەرىندە اكىمشىلىك ايىپپۇل تۇرىندەگى اكىمشىلىك جازاعا تارتىلدى", - دەپ حابارلادى وبلىستىق جەتىسۋ سوتىنىڭ ءباسپاسوز قىزمەتى.

قاۋلى زاڭدى كۇشىنە ەنگەن جوق.

"ادىرنا" ۇلتتىق پورتالى

پىكىرلەر