حالىقارالىق رەيتينگتە قازاقستان جوعارى دەڭگەيدەگى جەمقورلىق ەلدەرى قاتارىنان كورىندى، دەپ حابارلايدى “ادىرنا” ۇلتتىق پورتالى.
Transparency International حالىقارالىق ۇيىمىنىڭ 2024 جىلعى جەمقورلىق يندەكسىنە سايكەس، قازاقستان 180 ەلدىڭ ىشىندە 88-ورىندى يەلەنىپ، 40 بالل جينادى. بۇل ەلدەگى جەمقورلىق دەڭگەيىنىڭ ءالى دە جوعارى ەكەنىن كورسەتكەن.
Transparency International Kazakhstan اتقارۋشى ديرەكتورى مۇرات دانيار قازاقستانداعى جەمقورلىق ەل دامۋىنا ۇلكەن قاۋىپ توندىرەتىنىن اتاپ وتكەن.
“ەگەر بىزدە ەركىن باق، كۇشتى ازاماتتىق قوعام جانە بيلىكتىڭ شىنايى ەسەپتىلىگى بولماسا، جاعداي وزگەرمەيدى. جۋرناليستەر مەن بەلسەندىلەرگە جاسالعان قىسىم – ەلەۋسىز قالدىرۋعا بولمايتىن دابىل سيگنالى،” – دەدى ول.
ۇيىمنىڭ مالىمەتىنشە، سوت جۇيەسى، اتقارۋشى بيلىك جانە بيۋدجەت قاراجاتىن ماقساتسىز پايدالانۋ – جەمقورلىقتىڭ ەڭ كوپ كەزدەسەتىن سالالارى.
قازاقستان ورتالىق ازيا ەلدەرى اراسىندا ۇزدىك كورسەتكىشكە يە بولعانىمەن، وڭىردەگى جالپى جەمقورلىق دەڭگەيى جوعارى بولىپ وتىر. اتاپ ايتار بولساق، تۇركىمەنستان 165-ورىندا، تاجىكستان – 164 ورىندا، كورشىلەس قىرعىزستان – 146 ورىندا بولسا، وزبەكستان – 121 ورىندا ەكەن.
