بۇگىن، 10 اقپان كۇنى قارجى ءمينيسترى ءمادي تاكيەۆ پەن ۇلتتىق ەكونوميكا ۆيتسە-ءمينيسترى ازامات ءامرين بيزنەس وكىلدەرىمەن سالىق رەفورماسى شەڭبەرىندە قوسىلعان قۇن سالىعىنىڭ سارالانعان مولشەرلەمەلەرىن بەلگىلەۋ جونىندەگى ۇكىمەت ۇسىنىستارىن تالقىلادى، دەپ حابارلايدى «ادىرنا» ءتىلشىسى.
«ءبىز مىناداي تەتىكتى قاراستىرۋدى ۇسىنامىز: جالپى بەلگىلەنگەن ققس مولشەرلەمەسى 16%، اۋىل شارۋاشىلىعى ونىمدەرىن وندىرۋشىلەردى ققس-تان تولىق بوساتۋ، ال بىرقاتار سالالار ءۇشىن – 10% مولشەرىندەگى ارالىق مولشەرلەمە. وسىلايشا، ۇكىمەت ۇسىنىپ وتىرعان مولشەرلەمەلەردى سارالاۋ: 16%، 10%، 0% جانە بوساتۋ»، – دەدى ۇلتتىق ەكونوميكا ۆيتسە-ءمينيسترى.
ۇكىمەتتىڭ ءباسپاسوز قىزمەتى ققس مولشەرلەمەسىن ارتتىرۋ جانە سارالاۋ بيۋدجەتتىڭ مۇنايدان تۇسەتىن وزگەرمەلى كىرىستەرىنە تاۋەلدىلىگىن ازايتۋعا جانە مەملەكەتتىك باسىم جوبالاردى قارجىلاندىرۋعا مۇمكىندىك بەرەتىنىن اتاپ ءوتتى.
«قازىرگى ۋاقىتتا اگرارلىق سەكتوردا شارۋا قوجالىقتارى ققس تولەمەيتىنى، ال زاڭدى تۇلعالار قولدا بار جەڭىلدىكتەرگە بايلانىستى بيۋدجەتكە تولەۋگە ءتيىستى سالىقتاردىڭ تەك 30%-ىن تولەيتىنى اتاپ ءوتىلدى. جاڭا تەتىكتەر بويىنشا ولاردىڭ ەشقايسىسى ققس تولەمەيتىن بولادى. بۇل قازاقستاندىق اۋىل شارۋاشىلىعى ونىمدەرىن باسەكەگە قابىلەتتى ەتۋگە مۇمكىندىك بەرەدى. 10% مولشەرلەمە قولدانىلاتىن سالالاردىڭ تۇرلەرى بيزنەسپەن ءالى دە تالقىلانۋدا»،—دەلىنگەن حابارلامادا.
بۇعان دەيىن ەلىمىزدە قوسىلعان قۇن سالىعى مولشەرلەمەسىن 20 پايىزعا دەيىن كوتەرۋ ماسەلەسى تالقىلاندى. پرەزيدەنت قاسىم-جومارت توقاەۆ ۇكىمەت ۇسىنىپ وتىرعان مولشەرلەمەنىڭ تىم جوعارى ەكەنىن ايتىپ، ماسەلەنى تاعى دا پىسىقتاۋدى تاپسىردى.
