Búgin, 10 aqpan kúni Qarjy mınıstri Mádı Takıev pen Ulttyq ekonomıka vıe-mınıstri Azamat Ámrın bıznes ókilderimen salyq reformasy sheńberinde qosylǵan qun salyǵynyń saralanǵan mólsherlemelerin belgileý jónindegi Úkimet usynystaryn talqylady, dep habarlaıdy «Adyrna» tilshisi.
«Biz mynadaı tetikti qarastyrýdy usynamyz: jalpy belgilengen QQS mólsherlemesi 16%, aýyl sharýashylyǵy ónimderin óndirýshilerdi QQS-tan tolyq bosatý, al birqatar salalar úshin – 10% mólsherindegi aralyq mólsherleme. Osylaısha, Úkimet usynyp otyrǵan mólsherlemelerdi saralaý: 16%, 10%, 0% jáne bosatý», – dedi ulttyq ekonomıka vıe-mınıstri.
Úkimettiń baspasóz qyzmeti QQS mólsherlemesin arttyrý jáne saralaý bıýdjettiń munaıdan túsetin ózgermeli kiristerine táýeldiligin azaıtýǵa jáne memlekettik basym jobalardy qarjylandyrýǵa múmkindik beretinin atap ótti.
«Qazirgi ýaqytta agrarlyq sektorda sharýa qojalyqtary QQS tólemeıtini, al zańdy tulǵalar qolda bar jeńildikterge baılanysty bıýdjetke tóleýge tıisti salyqtardyń tek 30%-yn tóleıtini atap ótildi. Jańa tetikter boıynsha olardyń eshqaısysy QQS tólemeıtin bolady. Bul qazaqstandyq aýyl sharýashylyǵy ónimderin básekege qabiletti etýge múmkindik beredi. 10% mólsherleme qoldanylatyn salalardyń túrleri bıznespen áli de talqylanýda»,—delingen habarlamada.
Buǵan deıin elimizde qosylǵan qun salyǵy mólsherlemesin 20 paıyzǵa deıin kóterý máselesi talqylandy. Prezıdent Qasym-Jomart Toqaev Úkimet usynyp otyrǵan mólsherlemeniń tym joǵary ekenin aıtyp, máseleni taǵy da pysyqtaýdy tapsyrdy.
