قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى ءانشى قايرات پريمبەرديەۆتى قاماۋعا الىپ، ونىڭ ەلدەن شىعۋىنا تىيىم سالدى. بۇل تۋرالى بۇگىن، 10 اقپاندا 24.kg جازدى، دەپ حابارلايدى «ادىرنا» ءتىلشىسى.
ونەر يەسى «ۇلتارالىق ارازدىقتى قوزدىرۋعا» باعىتتالعان مالىمدەمە جاساعانى ءۇشىن ۇستالعان.
قازىرگى ۋاقىتتا ءتيىستى تەرگەۋ جانە پروتسەسسۋالدىق شارالار ءجۇرىپ جاتىر. قىرعىزستان زاڭناماسىنا سايكەس، «ۇلتارالىق، ءدىني نەمەسە ايماقارالىق ارازدىقتى قوزدىرۋعا باعىتتالعان ارەكەتتەر» ءۇشىن 10 جىلعا دەيىن باس بوستاندىعىنان ايىرۋ جازاسى قاراستىرىلعان.
ەسكە سالا كەتەيىك، قايرات پريمبەرديەۆ «Airan» YouTube-ارناسىنا بەرگەن سۇحباتىندا كەنەسارى حاننىڭ باسىن الۋ وقيعاسىن قوزعاپ، وسى جاعداي ءۇشىن قازاق حالقىنان ءوز اتىنان كەشىرىم سۇراعان ەدى. كەيىننەن قىرعىزستاننىڭ مادەنيەت ۆيتسە-ءمينيسترى مارات تاعاەۆ بۇل جاعدايعا قاتىستى پىكىر ءبىلدىرىپ، قىرعىزدار ءوز جەرىن قورعاعان ورمون حاننىڭ ارەكەتى ءۇشىن كەشىرىم سۇراماۋى كەرەك ەكەندىگىن مالىمدەدى.
