امەريكا پرەزيدەنتى ءداستۇرلى دۇعا اسىندا ءوزىنىڭ ءدىن سالاسىنا قاتىستى ۇسىنىستارىن جاريالادى. لاۋازىمدى تۇلعالار جينالعان بۇل اسقا قازاقستانداعى بەلگىلى ءدىنباسى، ەل «TikTok يمام» اتاپ كەتكەن نۇرلان بايجىگىتۇلى دا قاتىستى.
اقش پرەزيدەنتى دونالد ترامپ وتكەن بەيسەنبى، 6 اقپان كۇنى كاپيتوليدە دۇعا اسىنا قاتىستى. وندا ول ءدىندى ەلگە قايتارۋ كەرەگىن ايتتى.
«جاراتقان جارىلقاعان ءبىرتۇتاس ەل»
پرەزيدەنت ترامپ اق ۇيدە ءدىن بوستاندىعى بويىنشا كوميسسيا قۇرىپ، ءدىني سەنىم ىستەرى جونىندەگى وفيس اشاتىنىن ايتتى. سونىمەن قاتار، ول انتيحريستياندىق (جالپى دىنگە قارسى دەگەن ماعىنادا) كوزقاراستارمەن كۇرەسۋ ءۇشىن ادىلەت ءمينيسترى پەم بونديگە ارنايى توپ قۇرۋدى تاپسىرعان جارلىققا قول قوياتىندىعىن حابارلادى.
«ءبىزدىڭ رەسپۋبليكامىزدىڭ العاشقى كۇندەرىنەن باستاپ، قۇدايعا دەگەن سەنىم ارقاشان ەلىمىزدىڭ جۇرەگىن قۋاتتاندىراتىن كۇش بولىپ كەلدى. ءبىز ءدىندى قايتارۋىمىز كەرەك... امەريكا — ماڭگىلىككە جاراتقان جارىلقاعان ءبىرتۇتاس ەل»، -دەپ مالىمدەدى ول.
«بۇل توپتىڭ ماقساتى — فەدەرالدى ۇكىمەت قۇرىلىمدارىندا، سونىڭ ىشىندە ادىلەت مينيسترلىگى، سالىق قىزمەتى، فبر جانە باسقا اگەنتتىكتەردە كەز كەلگەن انتيحريستياندىق شابۋىلدار مەن كەمسىتۋشىلىكتى بىردەن توقتاتۋ»، - دەپ ءتۇسىندىردى ترامپ.
«امەريكا قاھارماندارىنىڭ ۇلتتىق باعى»
وس استا پرەزيدەنت ترامپ ەل تاريحىندا ماڭىزدى ءرول اتقارعان امەريكالىقتاردىڭ ەسكەرتكىشتەرى قويىلاتىن ۇلتتىق مۇسىندەر پاركىن قۇرۋ تۋرالى جارلىققا قول قويعانىن ايتتى. بۇل پارك «امەريكا قاھارماندارىنىڭ ۇلتتىق باعى» دەپ اتالادى.
ترامپ اسكەري تىكۇشاق پەن كوممەرتسيالىق ۇشاقتىڭ سوقتىعىسۋىنان 67 ادامنىڭ قازا تابۋىنا اكەپ سوققان وقيعاعا بايلانىستى ەندىگىدە جاڭا اۆتوماتتاندىرىلعان اۋە قوزعالىسىن باسقارۋ جۇيەسىن تەزىرەك ەنگىزۋ ءۇشىن كوگرەسسپەن بىرىگىپ جۇمىس ىستەيتىنىن ايتتى.
اقش باسشىسى ۇلتتىق دۇعا اسىندا قاتىسۋ ارقىلى 70 جىلدان استام ۋاقىت بويى ساقتالىپ كەلە جاتقان ءداستۇردى جالعاستىردى. بۇل ءىس-شارا ءتۇرلى ساياسي كوزقاراستار مەن پارتيالارعا تيەسىلى ادامداردى بىرىكتىرۋ ماقساتىندا وتكىزىلەدى.
«تۋرا پرەزيدەنتتىڭ الدىندا وتىرعان يمام»
بيىل ۆاشينگتوندا وتكەن قايىرىمدىلىق تاڭعى اسىنا قازاقستاننان بەلگىلى يمام، ءدىنتانۋشى نۇرلان بايجىگىتۇلى قاتىسقان بولاتىن. ول بۇل تۋرالى Instagram پاراقشاسىنا جازىپ، اسەرىمەن بولىسكەن ەدى.
«امەريكا قۇراما شتاتتارىنىڭ ۆاشينگتونداعى قايىرىمدىلىق تاڭعى اسقا كەلىپ وتىرمىن…مىڭداعان ادام. تۋرا مىنا جەردە اقش پرەزيدەنتى سويلەيدى. تۋرا پرەزيدەنتتىڭ الدىندا يمامدارىڭىز وتىر»، - دەدى نۇرلان يمام.
سونداي-اق، ول ترامپتىڭ شارا بارىسىندا سويلەگەن ءسوزى ەرەكشە اسەر ەتكەنىن ايتتى.
«امەريكا قۇراما شتاتتارىنىڭ 45-ءشى جانە 47-ءشى پرەزيدەنتى دونالد ترامپ مىرزا قايىرىمدىلىق شارادا ءسوز سويلەدى. «قۇدايىم مەنى اتقان ادامعا ولتىرتپەي، سىزدەردىڭ الدارىڭىزعا شىعارۋى، بۇل ەلىم ءۇشىن سىي ءارى مەنىڭ كوپ دۇنيەنى جاقسى جاعىنا وزگەرتۋىمە سەبەپ» دەپ ايتتى. بۇل ءسوزىن ۆاشينگتوندا تاپ مەنىڭ الدىمدا ايتقانى ماعان ۇلكەن اسەر بەردى. وتىرعان ورنىم دا تۋرا الدىنا تۇسكەن ەكەن. قاسىمدا ارمەنيا، كوسوۆو، ۋكراينا جانە ت.ب. مەملەكەت پرەزيدەنتتەرى وتىردى»، - دەپ جازدى نۇرلان بايجىگىتۇلى.
اس ەكەۋ، پرەزيدەنت بىرەۋ
وسى استان كەيىن پرەزيدەنت ترامپ ۆاشينگتونداعى قوناقۇيلەردىڭ بىرىندە جەكە توپتىڭ ۇيىمداستىرۋىمەن وتكەن باسقا ءبىر اسقا قاتىسىپ، ءسوز سويلەدى.
ايتا كەتسەك، دۋايت ەيزەنحاۋەر 1953 جىلى اقپاندا ءبىرىنشى بولىپ دۇعا اسىندا ءسوز سويلەگەن پرەزيدەنت. سودان بەرى ءاربىر پرەزيدەنت وسى ءىس-شاراعا قاتىسىپ كەلەدى. اتالمىش شارانىڭ امەريكا جۇرتىنىڭ رۋحاني جاڭارۋىنا باعىتتالعانى ايتىلادى.
بيىلعى اسقا قۇرمەتتى تەڭ توراعالار رەتىندە نيۋ-گەمپشير شتاتىنان دەموكرات سەناتورى مەگگي حاسسان مەن كانزاس شتاتىنان رەسپۋبليكاشىل سەناتور رودجەر مارشالل تاعايىندالدى.
2023 جىلى دا ۇلتتىق دۇعا اسى ەكىگە ءبولىنىپ وتكىزىلدى. ءبىرى كاپيتوليدە، وعان زاڭ شىعارۋشىلار مەن اكىمشىلىكتىڭ وكىلدەرى قاتىسسا، ەكىنشىسى ۆاشينگتونداعى قوناقۇيدىڭ بال زالىندا مىڭداعان ادامنىڭ قاتىسۋىمەن جەكە ءىس-شارا بولدى.
ءبىر استى وسىلاي ەكى بولەك وتكىزۋدىڭ سەبەبى رەتىندە زاڭ شىعارۋشىلاردىڭ ۇزاق جىلدار بويى وسى ءىرى ءىس-شارانى ۇيىمداستىرىپ كەلە جاتقان جانە ونى قارجىلاندىراتىن جەكە ءدىني توپتان ىرگەسىن اۋلاق سالۋ ەكەنى ايتىلادى.
