Amerıka prezıdenti dástúrli duǵa asynda óziniń din salasyna qatysty usynystaryn jarııalady. Laýazymdy tulǵalar jınalǵan bul asqa Qazaqstandaǵy belgili dinbasy, el «TikTok ımam» atap ketken Nurlan Baıjigituly da qatysty.
AQSh prezıdenti Donald Tramp ótken beısenbi, 6 aqpan kúni Kapıtolııde duǵa asyna qatysty. Onda ol dindi elge qaıtarý keregin aıtty.
«JARATQAN JARYLQAǴAN BIRTUTAS EL»
Prezıdent Tramp Aq úıde din bostandyǵy boıynsha komıssııa quryp, dinı senim isteri jónindegi ofıs ashatynyn aıtty. Sonymen qatar, ol antıhrıstıandyq (jalpy dinge qarsy degen maǵynada) kózqarastarmen kúresý úshin ádilet mınıstri Pem Bondıge arnaıy top qurýdy tapsyrǵan jarlyqqa qol qoıatyndyǵyn habarlady.
«Bizdiń respýblıkamyzdyń alǵashqy kúnderinen bastap, Qudaıǵa degen senim árqashan elimizdiń júregin qýattandyratyn kúsh bolyp keldi. Biz dindi qaıtarýymyz kerek... Amerıka — máńgilikke Jaratqan jarylqaǵan birtutas el», -dep málimdedi ol.
«Bul toptyń maqsaty — federaldy úkimet qurylymdarynda, sonyń ishinde ádilet mınıstrligi, salyq qyzmeti, FBR jáne basqa agenttikterde kez kelgen antıhrıstıandyq shabýyldar men kemsitýshilikti birden toqtatý», - dep túsindirdi Tramp.
«AMERIKA QAHARMANDARYNYŃ ULTTYQ BAǴY»
Os asta prezıdent Tramp el tarıhynda mańyzdy ról atqarǵan amerıkalyqtardyń eskertkishteri qoıylatyn ulttyq músinder parkin qurý týraly jarlyqqa qol qoıǵanyn aıtty. Bul park «Amerıka qaharmandarynyń ulttyq baǵy» dep atalady.
Tramp áskerı tikushaq pen kommerııalyq ushaqtyń soqtyǵysýynan 67 adamnyń qaza tabýyna ákep soqqan oqıǵaǵa baılanysty endigide jańa avtomattandyrylǵan áýe qozǵalysyn basqarý júıesin tezirek engizý úshin kogresspen birigip jumys isteıtinin aıtty.
AQSh basshysy Ulttyq duǵa asynda qatysý arqyly 70 jyldan astam ýaqyt boıy saqtalyp kele jatqan dástúrdi jalǵastyrdy. Bul is-shara túrli saıası kózqarastar men partııalarǵa tıesili adamdardy biriktirý maqsatynda ótkiziledi.
«TÝRA PREZIDENTTIŃ ALDYNDA OTYRǴAN IMAM»
Bıyl Vashıngtonda ótken qaıyrymdylyq tańǵy asyna Qazaqstannan belgili ımam, dintanýshy Nurlan Baıjigituly qatysqan bolatyn. Ol bul týraly Instagram paraqshasyna jazyp, áserimen bólisken edi.
«Amerıka Qurama Shtattarynyń Vashıngtondaǵy qaıyrymdylyq tańǵy asqa kelip otyrmyn…myńdaǵan adam. Týra myna jerde AQSh prezıdenti sóıleıdi. Týra prezıdenttiń aldynda ımamdaryńyz otyr», - dedi Nurlan ımam.
Sondaı-aq, ol Tramptyń shara barysynda sóılegen sózi erekshe áser etkenin aıtty.
«Amerıka Qurama Shtattarynyń 45-shi jáne 47-shi prezıdenti Donald Tramp myrza qaıyrymdylyq sharada sóz sóıledi. «Qudaıym meni atqan adamǵa óltirtpeı, sizderdiń aldaryńyzǵa shyǵarýy, bul elim úshin syı ári meniń kóp dúnıeni jaqsy jaǵyna ózgertýime sebep» dep aıtty. Bul sózin Vashıngtonda tap meniń aldymda aıtqany maǵan úlken áser berdi. Otyrǵan ornym da týra aldyna túsken eken. Qasymda Armenııa, Kosovo, Ýkraına jáne t.b. memleket prezıdentteri otyrdy», - dep jazdy Nurlan Baıjigituly.
AS EKEÝ, PREZIDENT BIREÝ
Osy astan keıin prezıdent Tramp Vashıngtondaǵy qonaqúılerdiń birinde jeke toptyń uıymdastyrýymen ótken basqa bir asqa qatysyp, sóz sóıledi.
Aıta ketsek, Dýaıt Eızenhaýer 1953 jyly aqpanda birinshi bolyp duǵa asynda sóz sóılegen prezıdent. Sodan beri árbir prezıdent osy is-sharaǵa qatysyp keledi. Atalmysh sharanyń Amerıka jurtynyń rýhanı jańarýyna baǵyttalǵany aıtylady.
Bıylǵy asqa qurmetti teń tóraǵalar retinde Nıý-Gempshır shtatynan demokrat senatory Meggı Hassan men Kanzas shtatynan respýblıkashyl senator Rodjer Marshall taǵaıyndaldy.
2023 jyly da Ulttyq duǵa asy ekige bólinip ótkizildi. Biri Kapıtolııde, oǵan zań shyǵarýshylar men ákimshiliktiń ókilderi qatyssa, ekinshisi Vashıngtondaǵy qonaqúıdiń bal zalynda myńdaǵan adamnyń qatysýymen jeke is-shara boldy.
Bir asty osylaı eki bólek ótkizýdiń sebebi retinde zań shyǵarýshylardyń uzaq jyldar boıy osy iri is-sharany uıymdastyryp kele jatqan jáne ony qarjylandyratyn jeke dinı toptan irgesin aýlaq salý ekeni aıtylady.
