ناميبيانىڭ تۇڭعىش پرەزيدەنتى سەم نۋيوما 95 جاسىندا قايتىس بولدى، دەپ حابارلايدى "ادىرنا" ۇلتتىق پورتالى.
ساياساتكەر سوڭعى ءۇش اپتاسىن اۋرۋحانادا وتكىزىپ، دەنساۋلىعىنىڭ ناشارلاۋىنا بايلانىستى ەم قابىلداعان.
سەم نۋيوما 1929 جىلى ناميبيادا دۇنيەگە كەلگەن. ول كەزدە ەل وڭتۇستىك-باتىس افريكا دەپ اتالىپ، وڭتۇستىك افريكا وداعىنىڭ باقىلاۋىندا بولعان. جاس كەزىندە تەمىرجولدا جۇمىس ىستەپ، ساياساتقا قىزىعۋشىلىق تانىتقان. ونىڭ باستى ماقساتى وتارشىلدىق بيلىكتەن ەلىن ازات ەتۋ ەدى.
ناميبيا 1884-1915 جىلدار ارالىعىندا گەرمانيانىڭ وتارىندا بولدى. 1959 جىلعا قاراي نۋيوما وۆامبولەند حالىق ۇيىمىنىڭ جەتەكشىسى اتاندى. بۇل قوزعالىس كەيىننەن وڭتۇستىك-باتىس افريكا حالىق ۇيىماسىنا (سۆاپو) اينالىپ، ناميبيانىڭ تاۋەلسىزدىگى ءۇشىن باستى كۇرەس كۇشى بولدى. بۇگىندە بۇل پارتيا ەلدىڭ بيلىك باسىنداعى پارتياسى.
1960 جىلى نۋيوما ەلدەن قۋىلدى. ول زامبيا، تانزانيا جانە انگولادا تۇردى. ناميبيانىڭ تاۋەلسىزدىگىن مويىنداتۋ ءۇشىن بۇۇ-عا جۇگىندى، بىراق وڭتۇستىك افريكا رەسپۋبليكاسى (وار) بۇعان قارسىلىق ءبىلدىردى.
1966 جىلى ناميبيادا تاۋەلسىزدىك ءۇشىن پارتيزاندىق سوعىس باستالدى. نۋيوما بۇل سوعىستى ەميگراتسيادان باسقاردى.
1989 جىلى، وار ناميبيادان باس تارتۋعا كەلىسكەن كەزدە، نۋيوما ەلىنە ورالدى. 1990 جىلى، 25 جىلعا سوزىلعان سوعىستان كەيىن، ناميبيا تاۋەلسىزدىگىن الدى.
سول جىلى وتكەن العاشقى پرەزيدەنتتىك سايلاۋدا نۋيوما ۇلكەن باسىمدىقپەن جەڭىسكە جەتتى. كەيىن 1994 جانە 1999 جىلدارى قايتا سايلاندى. كونستيتۋتسياعا وزگەرىس ەنگىزىپ، ءۇشىنشى مەرزىمگە سايلانۋعا مۇمكىندىك العانى ءۇشىن سىنعا ۇشىرادى.
2005 جىلى نۋيوما پرەزيدەنتتىك قىزمەتتەن كەتتى، ال 2007 جىلى سۆاپو پارتياسىنىڭ باسشىلىعىنان دا باس تارتتى. ول بۇل پارتيانى 47 جىل باسقاردى.
